«Rýhani jańǵyrý» baǵdarlamasyn iske asyrý jónindegi Ulttyq komissiia hatshysy, QR Prezidenti ákimshiliginiń ishki saiasat bóliminiń meńgerýshisi Aida Balaeva qazirgi qazaq ádebieti antologiialaryn BUU-nyń 6 tiline aýdaryp jatqan aýdarmashy, redaktorlarmen kezdesti, dep habarlaidy "Ult aqparat".
Kezdesýde Ulybritaniia, Ispaniia, Frantsiia, Resei jáne Qytai memleketterinen kelgen aýdarmashy-ádebietshilermen qazaq ádebieti jinaqtaryn aýdarý barysy talqylandy.
Aida Ǵalymqyzy qazaq ádebietiniń úzdik úlgilerin BUU-nyń 6 tiline aýdarý bastamasy buryn-sońdy bolmaǵan erekshe joba ekendigine toqtalyp, «bizdiń basty mindetimiz - aýdarmanyń kórkemdik sapasy qamtamasyz etý. Biz ol úshin qajet dúnieniń barlyǵyn istep jatyrmyz. Sondyqtan, aýdarmashylar men bizdiń avtorlardyń osyndai kezdesýi osy mindetti oryndaýymyzǵa septigin tigizedi degen úmittemin», - dedi. Sonymen birge, QR Prezidenti Nursultan Nazarbaevtyń «Rýhani jańǵyrý», «Uly dalanyń jeti qyry» maqalalarynda aitylǵan mádeniet pen ádebietti damytýǵa baǵyttalǵan sharalarymen tanystyryp, ony iske asyrýǵa atsalysýǵa shaqyrdy.
Qazirgi tańda antologiianyń aǵylshyn, frantsýz, ispan jáne orys tilderindegi jolma-jol aýdarmasy aiaqtaldy. Qytai men arab tilderindegi jolma-jol aýdarma protsesi júrip jatyr. Aýdarmashylar men qazaqstandyq avtorlardyń mundai kezdesýi aýdarmany túpnusqa mátinge meilinshe jaqyndatyp, onyń kórkemdik sapasyn qamtamasyz etpek.
