Qaiyrymdylyq degenimiz – azamattyq qoǵamnyń kemeldenýi. Bul týraly «Jomart júrek» syilyǵy laýreattaryn marapattaý sharasynda QR Aqparat jáne qoǵamdyq damý ministri Aida Balaeva aitty, dep habarlaidy QazAqparat.
«Búgin sondai-aq, elimizde jyl saiyn ótkiziletin «Jomart júrek» respýblikalyq syilyǵynyń iegerlerin biletin bolamyz. «Jomart júrek» bul – qaiyrymdylyq jasaý baǵytynda aýqymdy isterdi atqaryp júrgen uiymdardy anyqtap, olardy halyqqa tanystyrý maqsatynda beriletin arnaiy marapat. Bul - sondai-aq, óńirlerdi damytýǵa, qamqorlyq qundylyqtary men qaiyrymdylyq ideialaryn keńinen nasihattaýǵa, muqtaj jandarǵa kómek berýge daiyn azamattardyń jaqsy isterin dáripteýge múmkindik beretin biregei alań. 2018 jyly jyldan beri bul ataýly syilyq – 125 adamǵa berildi», - dep atap ótti ministr.
Onyń aitýynsha, biylǵy «Jomart júrek» syilyǵynyń iegerlerin táýelsiz sarapshylyq komissiia elimizdiń búkil óńirinen túsken 100-den astam ótinishtiń ishinen iriktep alǵan.
«Osylaisha, onlain daýys berý jáne esep komissiiasynyń sheshiminiń qorytyndysynda 5 atalym boiynsha 51 jeńimpaz anyqtaldy. Biraq, barlyq ýaqytta da eń basty jeńimpaz bizdiń qaiyrymdy júregimiz ben ystyq yqylasymyz bolyp qala beredi. Óitkeni, qaiyrymdylyq – azamattyq qoǵamnyń kemeldenýi», - dedi Aida Balaeva.
Ministr elorda men iri qalalarda ǵana emes, elimizdiń shalǵai eldi mekenderinde de qaiyrymdylyqpen ainalysýdy ómiriniń mánine ainaldyrǵan adamdardyń kóp ekenin basa aitty.
«Ainalamyzdy shýaqqa bólep, bir-birimizge qýanysh syilar meiirimdiligimiz sarqylmasyn, jaqsy isterimiz taýsylmasyn! Aldymyzda mol jetistikter kútip turǵanyna kámil senimdimin. Barshańyzǵa jaqsylyq, jetistik, tabys tileimin!», - dep túiindedi sózin Aida Balaeva.
