QR Aqparat jáne qoǵamdyq damý ministri Aida Balaeva Facebook-tegi paraqshasynda el azamattaryn Memlekettik rámizder kúni merekesimen quttyqtady, dep habarlaidy «Ult aqparat».
«Búgin - Qazaqstan Respýblikasynyń Memlekettik rámizderi kúni! 1992 jylǵy dál osy kúni táýelsiz Qazaqstannyń jańa memlekettik rámizderi alǵash ret bekitildi. Memlekettik rámizder - memlekettiń myzǵymas negizderiniń biri. Memlekettik rámizder barlyq ýaqytta qoǵamdaǵy ár adam úshin qasterli de, qasietti boldy. Rámizder halyqtyń bostandyǵy men táýelsizdigin beineleidi, onyń qundylyqtary men qasietti jerlerin, ata-babalar jadyn jáne jańa urpaqtyń bolashaq jetistikterin bildiredi» dep jazdy Aida Balaeva.
Ministr óz sózinde Qazaqstannyń Týy asqaraly biik taý shyńdaryna ornatylyp, ǵaryshtan Jer sharyn ainalyp ushqanyn, álemdik deńgeidegi sporttyq jeńisterde jelbirep, adamdardy azamattyq jáne kásibi erlikterge shabyttandyrǵanyn atap ótti.
«Qai qaisymyz da Týymyz, Ánuranymyz jáne Eltańbamyzdyń asqaq rýh, azattyq, qaharmandyq pen danalyqtyń qasterli nyshany ekenin jaqsy bilemiz. Biz árkez qasietti Týymyzdyń astynda Otanymyzdyń táýelsizdigi men halqymyzdyń baqytty da beibit ómirin qorǵaimyz. Beibit ýaqytta memlekettilik árbir qazaqstandyqtyń jetistikterin nyǵaitady - bizdiń árqaisymyz neǵurlym tabysty bolsaq, Táýelsiz Qazaqstan soǵurlym qýatty bolady» dep túidi oiyn ol.
Minist sóz sońynda elimizdiń barlyq azamattaryn osy qasietti de mańyzdy kúnmen quttyqtady.
«Barshańyzǵa ósip-órkendeý, ýaqytsha qiyn kezeńdi laiyqty eńserý, ómirlik kúsh-jiger men jasampazdyq tileimin!» dep jazdy Aida Balaeva.
