Aida Balaeva QR Prezidentiniń kómekshisi laýazymyndaǵy jumysynyń alǵashqy áserlerimen bólisti, dep habarlaidy "Ult aqparat".
«Mine, jańa laýazymdaǵy jumysymnyń úsh aptasy ótti. Osy ýaqyt ishinde bólimniń jumysyn uiymdastyrý boiynsha eń mańyzdy qadamdar jasaldy. Bir apta ishinde 100-den astam azamatty jeke qabyldadym. Munyń úlken emotsiialyq júgi bar», - dep jazdy Aida Balaeva Facebook-tegi paraqshasynda.
Onyń aitýynsha, halyqty tolǵandyratyn negizgi máseleler – turǵyn úi, bank nesieleri, sot sheshimderi men quqyq qorǵaý organdarynyń áreketteri.
«Kóptegen adamdar quqyqtyq saýattylyqtyń tómen bolýyna bailanysty qiyn jaǵdaiǵa tap bolyp, joǵary turǵan memlekettik organdarǵa úmit artady. Bul jerde kóterilgen máselelerdiń bárin qysqa merzimde sheshýge bolmaitynyn túsiný mańyzdy. Búginde Nur-Sultan qalasynyń ákimdiginde turǵyn úi kezeginde 48 myńǵa jýyq adam turady. Kóbi uzaq jyldar boiy kezekte tur. Sondyqtan, adam Prezident Ákimshiligine júgingendikten ǵana turǵyn úi berý múmkin emes», - dep atap ótti Memleket basshysynyń kómekshisi.
Ol óz jazbasynda baspana máselesi turǵyn úi kezegi negizinde sheshilý kerek degen pikirin aitty.
«Turǵyndarǵa Prezident Ákimshiliginiń sot sheshimine áser etýge quqyǵy joq ekenin túsindirý mańyzdy. Sot shaǵymdaryn tek Joǵarǵy sot nemese Bas prokýratýra ǵana qarai alady. Bizdiń mindetimiz-sapaly quqyqtyq kómek kórsetý, problemalardy sheshýdiń qolaily joldary men algoritmderin tabý. Osy aptada men Almatydan kelgen problemalyq ipotekalyq toppen kezdestim. Joǵarǵy Sottyń, Bas prokýratýranyń, Ulttyq banktiń jáne joǵary bilikti zańgerlerdiń qatysýymen arnaiy jumys toby quryldy. Osylaisha ári qarai jumys isteimiz» - dep jazǵan A. Balaeva jaqyn arada azamattardy jeke qabyldaý úshin óńirlerdi aralaitynyn málimdedi.
«Osyǵan bailanysty, bizdiń azamattyq qoǵamymyzǵa jáne úkimettik emes uiymdarǵa halyqtyń quqyqtyq saýattylyǵyn, mediatsiia institýttaryn damytýǵa belsendi túrde járdemdesýge shaqyramyn. Birlesken kúsh - jigerimizben ǵana azamattar úshin de, jergilikti atqarýshy organdar úshin de aitarlyqtai nátijelerge qol jetkizetinimizge senimdimin. Biz birlesip júieli problemalardy anyqtaýǵa jáne olardy sheshýdiń ońtaily joldaryn tabýǵa kómektesýimiz kerek» - dep túiindedi Aida Balaeva.
Eske salsaq, Memleket basshysynyń Jarlyǵymen Aida Balaeva QR Prezidentiniń kómekshisi – Qazaqstan Respýblikasy Prezidenti Ákimshiliginiń Ótinishterdi qaraýdy baqylaý bóliminiń meńgerýshisi bolyp taǵaiyndalǵan bolatyn.
