Saiasi qýǵyn-súrgin jáne asharshylyq qurbandaryn eske alý kúni qarsańynda QR Aqparat jáne qoǵamdyq damý ministri Aida Balaeva ALJIR mýzei-memorialdyq kesheninde jas tarihshylarmen kezdesti, dep habarlaidy "Ult aqparat".
Kezdesý «Tarihi sana – Táýelsizdiktiń rýhani tuǵyry» taqyrybynda ótti jáne jas ǵalymdar saiasi qýǵyn-súrgin jáne asharshylyq tarihy boiynsha zertteý nátijelerin aityp berdi.
«Táýelsizdiktiń 30 jyldyǵyn atap ótýdiń tujyrymdamasy men is-sharalar josparyna sáikes, mamyr aiy «Ulttyq birlik, beibitshilik jáne turaqtylyq» taqyrybymen ótip jatyr, tujyrymdama biylǵy 31 mamyr - saiasi qýǵyn-súrgin jáne asharshylyq qurbandaryn eske alý kúnine erekshe mán beredi», – dedi Aida Balaeva jas tarihshylarmen kezdesýdegi alǵysózinde.
Ministr qazirgi ýaqytta Qazaqstanda tarihymyzdyń jekelegen kezeńderin jan-jaqty zertteýge múmkindik bar ekenin atap ótti jáne jas tarihshylardy osy baǵytta akademiialyq jumystardy atqarýǵa shaqyrdy.
Kezdesýge jas tarihshylar men ǵalymdar, saiasi qýǵyn-súrgin qurbandaryn tolyq aqtaý jóninde memlekettik komissiia músheleri, ǵylymi-zertteý ortalyqtarynyń, arhivter men mýzeilerdiń qyzmetkerleri qatysty.
Olar Táýelsizdik alǵannan keiin tarihty ádil zertteýge, naqty faktilerdi bilýge jáne olardy qaita oi eleginen ótkizýge múmkindik týyndaǵanyn aitty.
«Qazaq halqynyń ótken ǵasyrdaǵy 20-30 jyldardaǵy tarihynyń qaraly betterin zerdeleý, bolshevikterdiń qylmystary týraly aqiqatty ashý qandai da bir basqa halyqqa qarsy baǵyttalǵan is-áreket retinde qarastyrylmaýy tiis. Degenmen, tarih barlyq halyqtardy ótkenniń qaiǵyly qatelikterin qaitalamaýǵa úiretip, eskertýi kerek. Ásirese, óskeleń urpaqty tarihymyzdyń aqiqatyna qanshalyqty ashy bolsa da úiretýimiz qajet. Sondyqtan Prezidenttiń tapsyrmasy boiynsha saiasi qýǵyn-súrgin qurbandaryn tolyq aqtaý jónindegi memlekettik komissiia quryldy. Endi tarihi qujattardy zerdelep, naqty derekterge negizdelgen senimdi zertteý júretinine senimdimin», – deidi A. Balaeva.
Aita keteiik, QR Tuńǵysh Prezidenti – Elbasy N.Nazarbaevtyń sheshimimen 1997 jyldan bastap jyl saiyn Qazaqstanda 31 mamyr Saiasi qýǵyn-súrgin qurbandaryn eske alý kúni retinde atap ótiledi.
