Parijdegi IýNESKO-nyń shtab-páterinde Elbasy Nursultan Nazarbaevtyń «Bolashaqqa baǵdar: rýhani jańǵyrý» maqalasynyń negizinde qazaqstandyq «Rýhani jańǵyrý» baǵdarlamasynyń aýqymdy tanystyrylymy bastaldy.
Sharanyń negizgi maqsaty men mindeti týraly "QazAqparat" tilshisine Qazaqstan Respýblikasy Prezidenti Ákimshiliginiń Ishki saiasat bóliminiń meńgerýshisi Aida Balaeva aityp berdi.
- Aida Ǵalymqyzy, qazaqstandyq "qoǵamdyq sanany jańǵyrtý baǵdarlamasyn" álemdik sarapshylarǵa osynshalyq joǵarǵy dárejede tanystyrý ne úshin qajet boldy?
- Prezidentimizdiń «Bolashaqqa baǵdar: rýhani jańǵyrý» atty maqalasynda usynylǵan ideialar zamanaýi álemdik úrdister hám trendtermen úndes ári sabaqtas. Ol - tek otandastarymyz úshin ǵana emes, dúniejúzilik qaýymdastyqtar úshin de úlken mańyzǵa ie joba. Sol sebepti atalǵan baǵdarlamanyń tanystyrylymyn joǵarǵy dárejede ótkizgendi jón sanadyq. Bul rásim qazaqstandyq modeldi ashyq alańǵa, ózgeshe talqyǵa shyǵarý úshin qajet boldy.
- Ne sebepti IýNESKO-ny tańdadyńyz?
- Rýhani jańǵyrýdyń qazaqstandyq modeliniń mazmuny osy uiymnyń ustanǵan baǵyttaryna jaýap beredi. Baǵdarlama negizinde gýmanitarly damýǵa súiengen adami kapital sapasyn jaqsartý jatyr. Bul - IýNESKO, qala berdi BUU mindetterimen úndes.
- IýNESKO shtab-páterinde tek qana «Rýhani jańǵyrý» baǵdarlamasy emes, sonymen qatar «Jahandaǵy zamanaýi qazaqstandyq mádeniet» jobasy tanystyrylyp jatyr. Óz kezeginde bul nemen bailanysty jáne alǵa qandai mindetter qoiyldy?
- Bizdiń memleket áldeqashan IýNESKO-men konstrýktivti qatynas ornatqan jáne bul turǵyda úlken tájiribege ie. Qazaqstan tarapy aitýly bastamalar usynyp, atalǵan uiym olarǵa qoldaý bildirip keledi.
Tiisinshe, Qazaqstan 2013-2022 jyldar aralyǵyndaǵy "Mádenietterdi jaqyndastyrýdyń halyqaralyq onjyldyǵyna" bastamashy boldy. Búgingi kúni memleket basshysynyń tapsyrmasymen Almatyda IýNESKO aiasyndaǵy mádenietterdi jaqyndastyrýdyń halyqaralyq ortalyǵyn qurý boiynsha belsendi jumys júrip jatyr.
Qazaqstan men IýNESKO-nyń bastamasy negizinde Uly Jibek joly boiymen halyqaralyq onlain-platformasy resmi túrde óz jumysyn bastady.
Al, «Rýhani jańǵyrý» baǵdarlamasynyń negizinde júzege asyp jatqan «Jahandaǵy zamanaýi qazaqstandyq mádeniet» jobasy - bul halyqaralyq mádeni bailanys pen ózara dialogty nyǵaitatyn taǵy bir mańyzdy bastama.
Budan bólek, otandyq mádeniet pen ádebiettiń ozyq úlgilerin sheteldik aýditoriiaǵa tanystyrý úshin birqatar sharalar uiymdastyrylmaq. Bizdiń bútin mádeni bailyǵymyzdy saýatty kórsetý úshin halyqaralyq áriptestermen birge jumys atqarǵan durys. Al, bul jumystardyń nátijeli bastalýy úshin IýNESKO-dan artyq alań tappaitynymyz anyq.
