Qazaqstanda qaiyrymdylyq isterimen tanylǵan «Betperdeli adam» 29 jastaǵy David esimdi kýrerge kútpegen syi jasady. Ol baspanasyz júrgen jigitke páter kiltin tabystap, kópten bergi armanyn oryndady, dep habarlaidy ult.kz.
Davidtiń ekinshi toptaǵy múgedektigi bar. Ol bala kezinen tserebraldy sal aýrýyna shaldyqqan. Sonymen qatar estý jáne sóileý qabiletinen aiyrylǵan. Densaýlyǵyndaǵy qiyndyqtarǵa qaramastan, jigit eshkimge alaqan jaimai, jaiaý kýrer bolyp eńbek etip keledi.
Alaida jumysy ońai emes. Aiaǵy jii aýyratyndyqtan, keide tapsyrystardy belgilengen ýaqytta jetkize almai qalady. Mundai sátterde tapsyrys berýshilerdiń aldynda ózin yńǵaisyz sezinetinin jetkizgen.
Jigittiń ómirindegi eń aýyr jaǵdailardyń biri – ata-anasynan aiyrylyp, jalǵyz qalýy. Onyń turaqty turatyn baspanasy da bolmaǵan. Tipti kei kúnderi túneitin jer tappai, aialdamada uiyqtaýǵa májbúr bolǵan.
«Men jetimmin. Anam da, ákem de, úiim de joq. Maǵan óte qiyn. Ata-anamdy qatty saǵyndym», – dep muńyn shaqqan David.
Qaiyrymdylyq jasaýshy jigitten eń úlken armany týraly suraǵanda, ol úsh dóńgelekti velosiped alǵysy keletinin aitqan. Sebebi mundai kólik onyń kúndelikti jumysyn jeńildetip, tapsyrystardy jyldamyraq jetkizýine múmkindik berer edi.
Alaida «Betperdeli adam» Davidke áldeqaida úlken tosynsyi daiyndaǵan. Aldymen oǵan armandaǵan úsh dóńgelekti velosipedin syilap, emdelýine qomaqty qarjy bólgen.
Eń áserli sát qaiyrymdy jan jigitke jeke páterdiń kiltin tabystaǵanda bolǵan. Osylaisha uzaq ýaqyt baspanasyz júrgen Davidtiń óz shańyraǵyna qol jetkizýine múmkindik týǵan.
Aita keteiik, Betperde kigen jigit 18 jastaǵy qyzǵa páter syilady.
"Betperdeli adam" kim?
Ol – Qazaqstanda muqtaj jandarǵa kómektesip, qaiyrymdylyq áreketterin áleýmettik jelide jariialaý arqyly tanylǵan azamat.
Ol kópshilik aldyna betperde taǵyp shyǵyp, óziniń jeke basynan góri jasaǵan jaqsylyqtaryna nazar aýdartady. Onyń kómegine baspanasyz qalǵan, densaýlyǵynda qiyndyqtary bar jáne áleýmettik qoldaýǵa muqtaj adamdar ie bolyp júr.
Onyń naqty aty-jóni áli resmi túrde jariialanǵan joq. Áleýmettik jelide keibireýler ony Dimash Qudaibergen nemese Sáken Maiǵaziev bolýy múmkin dep boljaǵan. Alaida bul pikirler rastalmaǵan.
2024 jyly BAQ-ta onyń Oral qalasynan shyqqan jas jigit bolýy múmkin ekeni jazylǵan, biraq bul málimet te rastalmaǵan.
