QR Bilim jáne ǵylym ministri Kúlásh Shámshidinova mektepte tórt pándi aǵylshyn tilinde oqytý máselesin túsindirdi, dep xabarlaidy QazAqparat tilshisi.
"Búginde barlyq adamdardy oilandyryp júrgen mańyzdy bir másele, ol - ximiia, fizika, informatika men biologiia pánderin joǵary klasta aǵylshyn tilinde oqytý. Osyǵan bailanysty qazir aǵylshynsha sabaq berýge asyqpai kóshý týraly sheshim qabyldanyp otyr. Respýblika boiynsha 150-den artyq mektep ol baǵdarlamaǵa kóshken. Biz qazir bulardy zerdelep, qarap otyrmyz. Oqýshylar neden qinalyp otyr? Ustazdar qandai qiyndyq kórip jatyr? Biz olarǵa qalai kómektesemiz? Sony jan-jaqty zerdelep jatyrmyz. Sondyqtan ustaz ben mektep daiyn bolǵan kezde, ózderińizben kelise otyryp, birtindep aǵylshyn tilinde oqytýdy engize bastaimyz. Asyqpaimyz, eshkim qýyp kele jatqan joq", - dedi K.Shámshidinova búgin Astanadaǵy kópbalaly analarmen bolǵan kezdesýde.
Osy oraida ministr eńbek naryǵynyń ózgerýine bailanysty bilimge qoiylatyn talaptyń da ózgerip jatqanyn erekshe atap ótti. Osy ýaqytqa deiin mektep oqýshysyna bilimdi berip, sol bilimdi qanshalyqty meńgergeni qaralsa, endigi kezekte bala sol bilimdi ómirde paidalana ala ma, joq pa, soǵan jumys isteý kerek.
"Búginde jańartylǵan bilim baǵdarlamasyn engizip otyrǵanymyz da sodan. Kóptegen memleketter óziniń bilim baǵdarlamalaryn qaita qarastyryp jatyr. Qazaqstan da sonyń ishinde. Aita ketetin taǵy bir másele, bizdiń balalarǵa informatika pánin durys berý, robot texnikasy negizderimen tanystyrý kerek. Sebebi texnologiialar zamanynda ómir súrip otyrǵannan keiin osy dúnielermen tanystyrýymyz qajet. "Atamekenmen" birlese otyryp, kásipkerlikke qatysty elektivti kýrstar engizýdi talqyladyq. Jalpy, biz balalarymyzdy bolashaq úlken ómirge daiyndaýymyz kerek", - dep atap kórsetti K.Shámshidinova.
Sonymen qatar, QR Bilim jáne ǵylym ministri bilimniń jańartylǵan mazmuny boiynsha muǵalimderdi daiarlaý sharalary týraly aityp berdi.
"Ózderińiz jaqsy bilesizder, 2016 jyly qyrkúiekten bastap jalpy mektepterde jańartylǵan bilim baǵdarlamasy engizile bastady. Al osy baǵdarlamaǵa bailanysty muǵalimderdi daiarlaý sharalary 2012 jyly bastalǵan bolatyn. Biraq soǵan qaramastan, aldaǵy úsh jylda 140 myń mektep muǵalimderi qaita daiarlaý kýrstarynan ótedi. Sebebi búginde bizge keregi - muǵalimderdiń daiyndyǵy. Búginde mekteptegi bilimniń sapasy, jalpy muǵalimderdiń balalarmen qarym-qatynasy, ata-anamen qatynasy muǵalimderdiń biliktiligine tikelei bailanysty", - dedi K.Shámshidinova.
Ministrdiń aitýynsha, úsh jyldyń ishinde mektepke kelip jatqan psixologtar men synyp jetekshilerin de oqytý josparlanǵan. Olardyń jalpy sany - 85 000 adam. Sondai-aq, 15 myńnan astam kolledj ustazdary men 2 myńǵa jýyq joǵary oqý ornynyń oqytýshylary qaita daiarlaý kýrstarynan ótetin bolady.
«Biz bárimiz oqydyq qoi. Sonda oqýlyqta taqyrypty ótkennen keiin astynda suraq bolatyn. Sol suraqtyń jaýaby taqyryptyń ishinde boldy. Qazir biz muǵalimderge bylai aityp jatyrmyz, sizder balaǵa daiyn óńdelgen aqparatty bermeńizder. Balaǵa suraq qoiý arqyly, esep shyǵartý arqyly, tapsyrmany oryndaý arqyly materialdy birtindep meńgerýge, bilimdi izdeýge úiretińizder dep jatyrmyz. Dál osy tusta muǵalimderdiń qinalyp jatqany baiqalady. Sol sebepti qaita daiarlaý kýrstaryn uiymdastyryp jatyrmyz», - dep atap kórsetti K.Shámshidinova.
Aita keteiik, buǵan deiin QR Prezidenti Nursultan Nazarbaev ta joǵary synyptarda pánderdi aǵylshyn tilinde oqytý máselesin túsindirgen bolatyn. «Ol kezde oqýshylar joǵary oqý ornyna túsýge daiyndalady. Al dál sol ýaqytta matematika, fizika, ximiia men biologiianyń terminderin aǵylshyn tilinde túsinip úirenbese, shetelde baryp, oqi almaidy. Sondyqtan muǵalimderge barynsha tyrysý kerek. Endi, aǵylshyn tilinde bir jyldyń ishinde úirete almaisyń. Al bizdikiler úsh ailyq kýrsty shyǵardy. Odan keiin matematikany aǵylshyn tilinde úiretesiń deidi. Ol - óte aýyr. Men ózim solai istep kórdim. Qiyn nárse eken», - dedi N.Nazarbaev Halyqaralyq áielder merekesine arnalǵan jiynda.
