QR Báskelestikti qorǵaý jáne damytý agenttigi aýyl shraýashylyǵy taýaryn óndirýshilerdiń «Qoldaý» júiesindegi shekteýler týraly shaǵymyna qulaq asty, dep habarlaidy "Ult aqparat".
Aýyl sharýashylyǵyna beriletin sýbsidiia «Qoldaý» júiesi arqyly elektrondy nusqada qabyldanady. 13 shildege deiin atalǵan júie arqyly sýbsidiia berý týraly ótinim rásimdeý úshin oblys biýdjetinde atalǵan maqsatqa bólingen qarajat bolýy kerek edi. Iaǵni biýdjette sharýa surap otyrǵan sýbsidiia túrine bólingen qarjy bolmasa, ótinish bere almaityn. Biýdjetke qarajat túsken kúnnen bastap ótinish qabyldaý bastalatyn.
«Qoldaý» platformasy qarajat bólingennen keiin ǵana ótinimderdi qabyldai bastaidy. Biraq ol qarajat eki-úsh kúnniń ishinde bitip qalady da, platforma ótinim qabyldaýdy toqtatady. Bul osy júiede jumys istei alatyn nemese osy salada mamandary bar adamdarǵa paidaly. Al osy eki-úsh kúnniń ishinde úlgermegenderi ótinish bere almaidy. Iaǵni agroónerkásip keshenindegi sýbektilerdiń sýbsidiialarǵa qol jetkizý múmkindigi teń emes», -dep sipattalǵan agentiktiń túsindirmesinde.
Agenttik mamandary atyraýlyq sharýalardyń osy shaǵymyn nazarǵa alyp, Aýyl sharýashylyǵy ministrligine sýbsidiia jónindegi ótinishterdi biýdjette qarajattyń bolǵan, bolmaǵanyna qaramastan qabyldap, óńdeýdi usynǵan bolatyn. Sondai-aq, túsken ótinishterdi berilgen ýaqyty boiynsha kezekke qoiý tártibin engizý týraly nusqaý berilgen.
13 shildede Aýyl sharýashylyǵy ministriniń mindetin atqarýshynyń № 207 buiryǵy shyǵyp, «Asyl tuqymdy mal sharýashylyǵyn damytýdy, mal sharýashylyǵy óniminiń ónimdiligi men sapasyn arttyrýdy sýbsidiialaý erejelerine túzetý engizildi. Budan bylai qarjy túspegen kezde qabyldanǵan ótinishter «kútý paraǵy» boiynsha kezekke qoiylady. Biýdjetke qarajat túsken boida sýbsidiia sol kezek boiynsha rásimdelýi kerek.
