Bloger, ázilkesh, stendaper Jansaia Muratbekova aqpan aiynda aǵasy kisi qolynan qaza tapqanyn estirtti, endigi ol aǵasynyń quqyǵyn qorǵaýǵa májbúr, sebebi tergeý barysynda ádiletsizdik ornaǵan, dep habarlaidy "Ult aqparat".
Blogerdiń jeti aǵasy men bir ápkesi bar. Aqpan aiynda altynshy aǵasy kenetten dúnieden ozǵan.
"Kezinde "qaryndasym" dep qorǵaǵan aǵamnyń quqyǵyn endi men qorǵap júrmin. Barlyqtaryńyzǵa qaiyrly kesh. 2 aidan astam ýaqyt instagramdy júrgizbedim. Oǵan úlken sebep bolǵanyn jaqsy bilesizder. Bilmeitinder bolsa, 18 aqpan kúni týǵan altynshy aǵam qaitys bolyp, qyrqyn da ótkizdik, sol sýyq habardy estigeli 2 aidan astam ýaqyt ótti. 40 jasyn toilaimyz dep júrgenimde qapyda aiyrylyp qaldyq. Qairat aǵam jaily qaisybir esteligimdi aitarymdy bilmeimin. 14 jasymda papam qaitys bolǵanda mamam ekeýmizdiń qolymyzǵa jeńgemmen kelip edi, sodan beri papamnyń ornyn joqtatpai qorǵanym bolyp keldi", – dep jazdy bloger.
Aitýynsha, kisi qolynan aiýandyqpen qaza tapqan aǵasynyń isi ádil túrde júrmei jatqan kórinedi. Ádildik izdeimin dep janushyrǵan ázilkesh aýylyndaǵy biraz bylyqtyń da betin ashty.
"Bul jaǵdaidy quqyq qorǵaý organdary ádil júrgizip, ári jiti qadaǵalasa esh jerge jariialamaimyn dep oilaǵan edim, biraq aitýǵa májbúrledińizder. Meniń aǵam kisi qolynan qaza tapty, naqtyraq aitqanda aiýandyqpen keltirilgen soqqylar saldarynan ketti. Osy is boiynsha tergeý barysynda ártúrli zań buzýshylyqtar bolyp jatqandyqtan jáne tergeýge 100 paiyz kóńilim tolmaǵandyqtan jaýapty adamdardyń ústinen árbir organǵa resmi túrde aryz jazdym. Ókinishke qarai bizdiń aýylda adamnyń ómiri oiynshyqqa ainalǵandyqtan, bar úmitimiz aýdanda bolǵan, biraq Aiagóz aýdanynyń ózi óte tómen deńgeide jumys jasap jatyr. Eski júie, tamyr-tanys beleń alyp tur. Álde adamnyń quqyǵy qala, aýylǵa bóline me? Qazirgi elimizde onlain bolyp jatqan sottyń ózi osylai sozylyp jatqanda, aýyl-aýdandaǵylar kisi qolynan qaza tapqan jaqynyn jerlep bir qinalsa, artynan onyń quqyǵyn aqtap, aqiqat pen ádildikke jetý úshin neshe ret qinalatynyn bilesizder me? Nege jábirlenýshi tarap aqiqat pen ádildikke jetý úshin ózderi júgirýi kerek? Kúdiktenip otyrǵan adamdar da jeterlik. Nege olardyń bul qylmysqa qatysy bar-joǵyn anyqtaý úshin taǵy da jábirlenýshi tarap júgirý kerek? Suraq ta, tekserilmegen nárse de kóp. 100 paiyz kóńilim tolmaiynsha tiisti jerdiń, jaýapty adamdardyń barlyǵyna jaza beretin bolamyn!", – dedi bloger.
