Afrikanyń batysyndaǵy Mali eliniń 25 jastaǵy turǵyny birden toǵyz balany dúniege ákeldi. Onyń beseýi – qyz, tórteýi – ul, dep habarlady Ria Novosti agenttigi.
Respýblikanyń densaýlyq saqtaý ministrligi áiel men balalardyń jaǵdaiy jaqsy ekenin málimdedi.
"2021 jyldyń 4 mamyrynda Halima Sisse kesar tiligi arqyly jeti balanyń ornyna toǵyz bala dúniege ákeldi. Mali men Marokkoda ótken ýltradybystyq zertteýden keiin áieldiń jeti bala kóterip júrgeni aitylǵan edi. Jańa týǵan sábilerdiń jaǵdaiy jaqsy", - dep habarlady Malidiń densaýlyq saqtaý ministrligi Facebook paraqshasynda.
El prezidenti Ba Ndaý da bul jańalyqty qýanyshpen qabyldady. Ol jańa bosanǵan áieldi elorda aýrýhanasynda eki apta bolǵannan keiin marokkalyq klinikaǵa aýystyrýdy tapsyrdy. Eldiń densaýlyq saqtaý ministri Fanta Sibi áieldi bosandyryp alǵan akýsherlerdi quttyqtady. Ol mamandardyń arqasynda júktiliktiń jaqsy ótkenin aitty.
Toǵyz balanyń anasy - 25 jasta. Birneshe aptadan keiin olar Malidegi úiine oralady.
Aita keteiik, 2016 jyly Úndistan turǵyny Mariia Fernandes 42 jasynda 11 bala dúniege ákeldi. Ol tabiǵi jolmen bosanǵan.
