QR Táýelsizdiginiń 30 jyldyǵyn merekeleý aiasynda Grekiia astanasy Afinada Qazaqstannyń Memlekettik týyn kóterý rásimi ótti. Bul týraly QR Syrtqy ister ministrliginen málim etti, dep habarlaidy QazAqparat.
Is-sharaǵa Grekiia Respýblikasynyń Syrtqy ister ministri Nikos Dendias, Attika óńiriniń Gýbernatory Georgios Patýlis, Grekiia Parlamentiniń depýtattary, astanalyq mýnitsipalitetterdiń merleri, sondai-aq iskerlik jáne akademiialyq toptardyń ókilderi qatysty.
QR SIM aqparatyna súiensek, Grekiia syrtqy saiasat vedomstvosynyń basshysy Nikos Dendias óz sózinde qazaqstandyqtardy táýelsizdiktiń mereitoiymen quttyqtap, eki el arasyndaǵy qarym-qatynastardyń damýyndaǵy oń dinamikany atap ótti.
Ministrdiń aitýynsha, Qazaqstan Táýelsizdik jyldarynda óńirdegi beibitshilik, turaqtylyq pen gúldenýdiń ortalyǵyna ainaldy. Qazaqstan men Grekiianyń negizgi halyqaralyq jáne óńirlik máseleler boiynsha ortaq kózqarasta ekendigin qanaǵattana otyryp atap ótti.
«Sonymen qatar, grek diplomaty halyq diplomatiiasynyń mańyzdylyǵyna erekshe nazar aýdaryp, Qazaqstandaǵy on myńdyq grek diasporasy men Qazaqstannan tarihi Otanyna oralǵan seksen myńǵa jýyq etnikalyq grekterdiń ekijaqty qarym-qatynastardy damytýdaǵy mańyzdy biriktirýshi faktor bolyp tabylatynyn málim etti», - delingen QR SIM málimetinde.
Óz kezeginde Qazaqstan Elshisi Erlan Baýdarbek-Qojataev Syrtqy ister ministri N.Dendiastyń saltanatty rásimge qatysýyn Grekiia basshylyǵynyń Qazaqstanmen keń aýqymdy máseleler boiynsha yntymaqtastyqty nyǵaitýǵa múddeli ekendigin kórsetetinin atap ótti. Elshi kelesi jyly Qazaqstan men Grekiia arasyndaǵy diplomatiialyq qarym-qatynastardyń ornaǵanynyń otyz jyldyǵy aiasynda birqatar qoǵamdyq jáne mádeni is-sharalar uiymdastyrý boiynsha birlesken josparlary týraly habardar etti.
Saltanatty is-shara aiasynda «Qazaqstan Respýblikasynyń Táýelsizdigine 30 jyl» taqyrybyndaǵy dóńgelek ústel de ótti. Bul jiynda Aharnes astanalyq mýnitsipalitetiniń meri Spiridon Vrettos, Shymkent qalasynyń týmasy, Grekiia Parlamentiniń depýtaty jáne grek zań shyǵarýshylarynyń ishindegi eń jas áiel adam Mariia Apatzidi, sondai-aq Qazaqstannyń Grekiiadaǵy qurmetti konsýldary men basqa qonaqtar spikerler retinde sóz sóiledi.
Shara barysynda ulttyq aspaptarmen mýzykalyq qoiylym uiymdastyryldy. Qonaqtardy ataqty grek bii sirtakidiń dombyramen oryndalýyn qosa alǵanda, qazaq kúileriniń sazdy popýrrii erekshe qyzyqtyrdy.
