AES ǵylym men tehnologiiany damytý úshin qajet — Erlan Qoshanov

Foto: Amanat partiiasy

23 tamyzda Túrkistan oblysynyń Nysanbek aýylynda ótken «Jastar Rýhy» respýblikalyq saiasi lagerine Májilis spikeri jáne «AMANAT» partiiasynyń tóraǵasy Erlan Qoshanov qatysyp, jastarmen kezdesti. Lagerge elimizdiń ár túkpirinen kelgen 420 delegat jinaldy, dep habarlaidy "Ult aqparat".

Qoshanov jastardyń jańa úrdisterdiń aldyńǵy qatarynda júretinin jáne olardyń memleketimizdiń qozǵaýshy kúshi bola otyryp, Ádiletti Qazaqstannyń bolashaǵy sanalatynyn atap ótti. Ol sondai-aq eki jyl buryn «Jastar Rýhy» ataýy qabyldanǵannan beri uiymnyń qarqyndy damyp, jastardyń rýhyn kóteretin mańyzdy qozǵalysqa ainalǵanyn aitty.

Májilis tóraǵasy memleket tarapynan jastardyń áleýmettik máselelerin sheshýge baǵyttalǵan aýqymdy jumystar atqarylyp jatqanyn da atap ótti. Sonyń ishinde jastardy jumyspen qamtýǵa baǵyttalǵan «Jastarǵa jumys», qarjylyq saýattylyqty arttyrýǵa arnalǵan «Qaryzsyz qoǵam», aýyldyq jerlerde jeńildetilgen nesie berýdi kózdeitin «Aýyl amanaty» jobalary júzege asyrylýda.

Is-shara barysynda jas kóshbasshylar AES salý máselesin de talqylap, bul bastamany qoldaitynyn bildirdi. Ǵalymdar men jas mamandar Qazaqstandaǵy energiia tapshylyǵyn sheshýdiń tiimdi joly retinde atom energiiasyn paidalanýdy qoldady.

Qoshanov AES qurylysy men atom energetikasynyń eldiń bolashaǵy úshin mańyzdylyǵyn atap ótip, jastardy bul máselede belsendi bolýǵa shaqyrdy. Onyń aitýynsha, Qazaqstannyń táýelsizdigin nyǵaitý jáne ekonomikasyn ornyqty damytý úshin AES salý qajet.

Lager barysynda basqa da ózekti taqyryptar talqylanyp, jastardyń saiasi jáne áleýmettik belsendiligin arttyrýǵa arnalǵan birqatar bastamalar kóterildi.