Ádilet ministrligi zańnama departamentiniń direktory Baqtygúl Ataǵazieva Prezidenttiń advokat pen prokýrordyń teńdigin qamtamasyz etý baǵytyndaǵy tapsyrmasy qalai oryndalyp jatqanyn aityp berdi, dep habarlaidy QazAqparat.
«Memleket basshysy «Jańa jaǵdaidaǵy Qazaqstan: is-qimyl kezeńi» atty Joldaýynda sottyń básekege qabiletti, al sýdianyń aiyptaý tarapynan táýelsiz bolýy kerektigin jáne ol úshin advokat pen prokýrordyń teńdigin qamtamasyz etý qajettigin atap ótken bolatyn. Múddeli memlekettik organdar advokattyq qaýymdastyqpen birlesip ázirlegen túzetýler Bas prokýratýranyń qylmystyq protseste azamattardyń quqyqtaryn qorǵaýdy kúsheitý boiynsha jáne Májilis depýtattarynyń bastamasymen ázirlengen advokattyq qyzmet jáne zań kómegi máseleleri týraly zań jobalarynda kórinis tapty», - dedi Baqtygúl Ataǵazieva Ádilet ministrliginiń onlain rejimdegi alqa májilisinde.
Onyń aitýynsha, búginde zań jobalary Parlament Májilisiniń qaraýynda.
«Mysaly advokat iske kirisken sátten bastap qylmystyq isti qozǵaýǵa negiz bolǵan ustap alý, qaraý, tintý hattamalary, mamandar men saraptamalardyń qorytyndylary jáne ózge de protsestik qujattardyń naqty tizimimen tanysýǵa múmkindik beretin túzetýler kózdelgen. Bul túzetýler qabyldanǵan jaǵdaida advokattar qorǵaý baǵytyn tiimdi qurýǵa múmkindik alady. Óz kezeginde advokattar tarapynan teris paidalanýdyń yqtimal faktilerin boldyrmaý maqsatynda olardyń ókilettikterin keńeitý sheńberinde, bizdiń oiymyzsha, jergilikti tártiptik komissiialar jazadan qutylmaýshylyq qaǵidatyn saqtaýǵa basa nazar aýdara otyryp, óz jumysyn túbegeili qaita qaraýy qajet. Advokattar mártebesin arttyrý turǵysynan Respýblikalyq advokattar alqasynyń rólin kúsheitý de mańyzdy», - deidi ol.
Baqtygúl Ataǵazieva qazirgi tańda respýblikalyq advokattar alqasynyń tikelei ókilettigi joq, barlyq sheshimderdi onyń tóralqasy qabyldaitynyn jetkizdi.
«Osyǵan orai tóralqanyń alqalar qyzmetin úilestirý, advokattardyń kásiptik deńgeiin kóterý, alqalardy ádistemelik, aqparattyq qamtamasyz etý, tártiptik praktikany qorytý jáne basqa ókilettikterin Respýblikalyq advokattar alqasyna berý oryndy bolyp kórinedi. Usynylyp otyrǵan sharalar elimizdegi advokatýranyń damýyna oń áserin tigizedi dep oilaimyz», - dedi ol.
