Ádilet ministrligi kadr qyzmetiniń basshysy Qasymqoja Ómirovtyń aitýynsha, únemdelgen 2 mlrd teńge qalǵan qyzmetkerlerdiń jalaqysyn arttyrýǵa jumsalyp jatyr, dep habarlaidy QazAqparat.
«Osy jyldyń aqpanynan bastap Ádilet ministrliginiń aýmaqtyq deaprtamentteriniń bári de faktorly-baldy shkala júiesine ótti. Kelesi jyldan bastap jańa ádistemege sáikes memlekettik qyzmetshilerdiń búkil jumys ótili esepteledy – bul olardyń ailyǵyn kezekti ret kóteredi. Qazirgi ýaqytta biz memlekettik qyzmetshilerdi, sondai-aq vedomstvoishilik uiymdardyń qyzmetkerlerin ońtailandyrý jumystaryn júrgizýdemiz. Osynyń arqasynda qarajat únemdeledi. Faktorly-baldy shkalaǵa ótý – oń tájiribe kórsetti», - dedi Qasymqoja Ómirov Ádilet ministrliginiń onlain rejimde ótken alqa májilisinde.
Onyń aitýynsha memlekettik qyzmetshilerdiń ornyna legen báseke de qyza túsken. Buryn bir orynnnan bes adam úmittense, qazir bir vakantty orynnan úmitkerlerdiń sany 13 adamǵa deiin jetken.
«Vedomstvoishilik uiymdardaǵy qyzmetkerlerdiń sanyn biyl 10, kelesi jyly 15 paiyzǵa qysqartamyz. Ótken jyldan beri memqyzmetshilerdi ońtailandyrý jumysyn júrgizip, ol sharýany osy jyldyń alǵashqy toqsanynda aiaqtadyq. Bul jumys Ádilet ministrliginiń barlyq aýmaqtyq departamentterin faktorly-baldy shkalaǵa ótkizýge jol ashty. Biz 700-ge tarta qyzmetkerdi, shamamen barlyq qyzmetkerlerdiń 30 paiyzyn qysqarttyq. 200-ge tarta basshylyq laýazymy joiyldy. 30 myń sharshy metr keńse oryny, 109 kólik bosady. Qysqartylǵan qyzmetkerlerdiń ishinde basshylyqta bolǵandar da bar. Orta jáne tómengi sanattaǵy qyzmetkerlerdiń ailyǵy 2-2,5 ese ósti. Osylaisha 2 mlrd teńge únemdeldi. Ol qarajat qalǵan qyzmetkerlerdiń ailyǵyn arttyrýǵa jumsalyp otyr», - dedi ol.
