Ádildiń iz-túzsiz joǵalyp ketkenine 20 jyldai ýaqyt ótipti. Taǵdyry tylsymǵa toly talanttyń ómirde bar-joǵy áli kúnge belgisiz. 23 shilde týǵan kúni bolatyn. Bar jubanyshymyz keiinnen jaryqqa shyqqan jalǵyz kitaby ǵana. Aqynnyń dúnie esigin ashqan kúni eleýsiz qalmasyn dep "Ómirzaiadan" bir toptama jariialaýdy jón kórdik.
ÁÝMIN DEŃIZ
Mynaý óleń —
Buiyryp Haq jazaǵa,
Qoiyny tolyp azaǵa,
Sháhit bolǵan shaharlarǵa — janaza...
Mynaý óleń —
Ada bolyp armany,
Aram ólip ardaǵy,
Aqsheldengen alaryp
Janarlardyń marjany.
Mynaý óleń —
Almas tilip gúl-óńin,
Arqan qiyp bilegin,
Dushpan elge kúń bolǵan
Arýlardyń aitsam deidi tilegin.
Mynaý óleń —
Bolmai sol tus toqtaýy,
Jalmap ketken ot-jaýy,
Meshitterdiń,
Meshitterdiń joqtaýy.
Mynaý óleń —
Emdep eldiń júregin,
Serpip tastap túnegin,
Sháhit bolǵan shaharlardy túleter
Ul týsa der tilegim...
Kóńilińizge ornar bolsa jyrym nyq,
Sanańyzǵa artar bolsa syrym júk,
Osy óleńdi oqyp bolyp, aǵaiyn,
Áýmin deńiz yrym qyp.
AVTOBIOGRAFIIa
Onyń
Qanyndaǵy juldyz nury tym kógildir bolatyn,
Máńgilik dep ataityn-dy ol ózi túsken jol atyn.
Úmitteri sharpyldy da pendeliktiń sáýlesine qan qyzyl,
Ólip qaldy tań aldynda ol aqyn,
Ólip qaldy ol aqyn.
Joq,
Aldymen az kún júrdi kóleńke bop kórinip,
Sosyn ketti san sanaǵa shamshyraq bop bólinip.
Qara túnde qaldym onyń qýys tánin jamylyp,
Qoldarymda syǵymdalǵan óli úmit,
Qoldarymda óli úmit.
Sosyn,
Onyń jalǵyz jyrmen tirshiliktiń órnegin
Ózgertsem dep janyn túnge bergenin
Esime alyp, solǵyn-solǵyn jyrlar jazdym birer kún.
Tirilmesin uqtym da, úmitterin júregime jerledim,
Júregime jerledim.
Solai...
Onan beri talai shapty tamyrymdy tunyq tún.
Saǵym qýdym... ne dep ǵumyr kesherimdi umyttym.
...Únsiz kútem qaiyrylar dep sol aqyn
Keýdemdegi molasyna úmittiń,
Molasyna úmittiń.
JOLDANBAITYN HAT
Taǵy da uiqysyz tún,
Saǵynyshty,
Tátti qaiǵy,
Júrekti taǵy qushty,
Elesińe
Táý ettim, aimalaǵan,
Qulaq kesti qulyńmyn baǵynyshty.
Taǵy da muńaiamyn,
Myna túnniń
Salǵan ánin lebinen uǵatynmyn.
Endi, mine, súlde bop qaldym sensiz,
Bárin, bárin joǵaltyp muratymnyń.
Taǵy da juldyz aqty,
Alaqanyń...
Juldyzdy qondyrǵanyn jaratamyn.
Sebebi: myna juldyz — meniń janym,
Seni izdegen qorǵansyz balapanym.
Taǵy da tún sóileidi,
Menen kóne...
Syr tartyp jol shegedi óleń-keme.
Bir uqsa sol uǵady taǵdyrymnyń
Meni zar ǵyp qoiǵanyn kóleńkeńe.
Taǵy da jel ulidy,
Qarańǵylyq,
Oiymda — erke minez, balań qylyq.
Qara qaiǵy keýdemdi tyrnalaidy,
Basylamyn qasqyr bop alam da ulyp.
Taǵy da qaiǵy oraldy,
Qara qaiǵy,
Júregimdi keskilep jaralaidy.
Qul bolsam da ózińe... tiri janmyn,
Tiri jandy azaptaý jaramaidy.
Taǵy da bult kóshedi,
Paraqtaǵy
Jazylǵan jyr-janardan qan aqqaly,
Sen ketkeli baqytym óldi meniń,
Men úshin tań atpady, tań atpady,
Sen ketkeli men úshin tań atpady.
Taǵy da uiqysyz tún,
Haty myna,
Qulyńnyń ár túniniń aty — shúbá.
Ózińe jeter bolsa bir qaiyrylyp,
Quran oqyp ketseńshi baqytyńa.
JYRMEN JÝYP JULDYZDARDYŃ JAMALYN
Raýshan gúlge gaýhar shyq bop tamatyn,
Jyr jazam dep aiyrylǵan taǵynan.
Tasjetimmin, muń kórsem de, qalamym,
Endi kimge shaǵynam?
Jyrmen jýyp juldyzdardyń jamalyn,
Jalǵyzdyqty úiretken em Aiǵa da.
Tek tirlikte taýsyldy da amalym,
Aqyndyǵym aspai qoidy paidaǵa.
Jalǵyz janǵa jarasady jaqsylyq,
Jylai berseń táńirde de bar qulaq.
Degenmenen dem taýysty tirshilik,
Meniń jalǵyz gaýharymdy tartyp ap.
Japyraǵym jasyl ot bop janatyn,
Sen de ómir me eń bir kezderi, sary baý?
Raýshan gúlge gaýhar shyq bop tamatyn,
Men de jyr em, jyr edim ǵoi, Táńir-aý!
SOŃǴY ÁN
Meniń sońǵy saǵynyshty ánim bul,
Rýhyń jetse tyńdap qal.
Mende jan joq,
Jeti jetim — tánim qur,
Sheshe almaǵan qaldy jymsyz jumbaqtar.
Men solardyń tappaq bolyp sebebin,
Kórip talai kóńilsizdeý tús túnde.
Tússiz muńǵa aiaq bassam dep edim,
Iz qaldyrmai appaq qardyń ústinde.
Sol armanmen tirlik keship týlaqtai,
Qara jerge qar bop jaýyp,
Eńselim.
Bul kúnderi janarymdy sýlatpai,
Kóz aldyńda kúzge ainalsam men seniń.
Sary belden án sozatyn jańǵyryp,
Kúzdi kór de, kúz artynan meni kór.
Men essizbin,
Jumbaqtarym máńgilik,
Sheshe almaityn essizdiktiń emi — kór.
Kórge qarai ósip kóńil teregi,
Kózsiz túnde kókke qarai ulyǵan.
Kim juldyzdyń júregin ap beredi,
Sheshýi joq jumbaqtardyń qulyna?
Moiyndamai pendeliktiń kesimin,
Kór túbinde jaryq tur dep bir eli.
Jan edi der jumbaǵynyń sheshimin
Izdep ótken órtengenshe júregi.
Dertti jandai zárý bolǵan dárige,
Mi qurǵatyp máńgiliktiń jolynda.
Jannyń kirin qanmen jýyp sáride,
Men kóshermin qursaǵymnan qorymǵa.
Mine, solai, saǵynyshty án mynaý,
Muny aitýǵa bolar edi sózsiz-aq.
Erterekte kórgenindei san jyraý
Kók júzinde kúimelerdi kózsiz-aq.
Biraq maǵan móp-móldir muń syilar kim,
Armanyma alqa qylyp taǵýǵa?
Jansyz qolym jetpei nege qinaldym,
Táńirimniń terezesin qaǵýǵa?!
SAǴYNYSh
Osylai, janym, udai,
Ketisip... saǵynarmyz.
Adamnyń bári — Qudai,
Qudaidyń bári — jalǵyz...
Taǵdyr sol jelókpe tek,
Netemiz... kónemiz de.
Ketemiz bólek-bólek
Beishara kememizde.
Ketemiz jaǵamyzǵa,
Alysqa úńile kil.
Qaitalap sanamyzda:
«Jalǵyzdyń júgi jeńil,
Jalǵyzdyń júgi jeńil».
Sońǵy sóz, sońǵy núkte,
Birlikke tyiym salar.
Jalǵyz jan torǵa ilikse,
Tirlik te qiyn soǵar...
Osyny oilamadyq,
Janym-aý, qate edi bul.
Asqaqtyq boilap alyp,
Bizderdi ketedi kil.
Sezimge jarymaǵan,
Jylaidy áli keýde.
Qudaidyń bári de adam,
Adamnyń bári pende.
