Keleshekte ádebiet boiynsha Nobel syilyǵynyń qurlyqtyq balamasy – Úlken Aziia syilyǵy taǵaiyndalýy múmkin. Mundai jańalyqty elordada ótkeli jatqan Aziia elderi qalamgerleriniń I forýmy aldynda Qazaqstan Jazýshylary odaǵynyń tóraǵasy, aqyn Ulyqbek Esdáýlet jariia etti, dep habarlaidy QazAqparat tilshisi.
«Bul forýmda úsh jylda bir ret Aziianyń bir memleketinde osyndai jiyn ótkizý týraly usynys aitylady. Sonymen qosa, Aziia keńistiginiń, qurlyǵynyń óziniń Nobel syilyǵy siiaqty – Úlken Aziia syilyǵyn taǵaiyndaý máselesi talqylanady. Búgin estafetany bir elge berýimiz múmkin», - dedi Ulyqbek Esdáýlet tilshilerdiń suraǵyna jaýap bere otyryp.
Ulyqbek Esdáýlettiń aitýynsha, álem elderinen kelgen aqyn-jazýshylar da búgingi forýmda óz usynystaryn ortaǵa salady.
«Osy forýmnyń qorytyndysynda eki tomdyq antologiia jaryq kóredi. Biz barlyq qatysýshylardyń baiandamasyn jinap, segiz tilge aýdaramyz. Kórkem shyǵarmalaryn jinap, antologiiaǵa qosý – ekinshi másele. Osy ǵimaratqa kirgen bette Aziia ádebietiniń kórmesi jasaqtaldy. Aziianyń kitaptarynyń Qazaqstan astanasynyń tórinde shoǵyrlanýynyń ózi – Aziia elderiniń aqyn-jazýshylarynyń yntymaǵyn, birligin ańǵartady dep esepteimin», - dedi Qazaqstan Jazýshylary odaǵynyń tóraǵasy.
Aita ketsek, sanaýly sátterden keiin elordada Aziia elderi qalamgerleriniń tuńǵysh forýmy bastalady. Aýqymdy sharaǵa Prezident Qasym-Jomart Toqaevtyń qatysýy kútilip otyr. QR Prezidenti Ákimshiligi men QR Mádeniet jáne sport ministrliginiń qoldaýyman ótetin shara 4-6 qyrkúiek kúnderine josparlanǵan. Forýmǵa Nobel syilyǵynyń nominanttary, Býker jáne ASEAN syilyqtarynyń laýreattary, jazýshylar odaqtary men qaýymdastyqtarynyń tóraǵalarynan quralǵan 90 qonaq keledi degen jospar bar.
Forýmǵa kele jatqan 70-ten astam aqyn-jazýshynyń bári de óz elinde eń tanymal tulǵalar deýge bolady. Solardyń arasynda Qytai Memlekettik syilyǵynyń iegeri, beijińdik jazýshy, qandasymyz Ákbar Májit te bar. Jalpy bul forýmǵa Qytai óziniń úsh jazýshysyn jiberip otyr. Irandyq Saiid Hodi Kiesari de parsy áleminde kózi tiri jazýshylardyń eń tanymaly sanalady. Reseiden Anatolii Kim bastaǵan 5 ádebietshi, Úndistannan «Dýrbapýtra» romanynyń avtory Amar Mitra, Malaiziiadan ǵalym-aqyn Mýhamad Salleh, Vetnamnan «Teksiz adam tarihy» kitabynyń avtory Hýan Dýk siiaqty tanymal ádebiet ókilderi qatysady.
