Búgin mádeniet, óner, ǵylym jáne ádebiet salasyndaǵy Túrik Ádebi jáne Ǵylymi eńbekteri Avtorlar Qoǵamy (İLESAM) men Qazaqstan Jazýshylar odaǵy arasyndaǵy birlesken jumystardy qamtityn yntymaqtastyq týraly kelisim-shartqa qol qoiyldy, dep habarlaidy "Ult aqparat".
Qazaqstan Jazýshylar odaǵynda ótken bul mańyzdy kezdesýge Qazaqstan Jazýshylar odaǵy basqarmasynyń Tóraǵasy Ulyqbek Esdáýlet, "İLESAM" Túrik Ádebi jáne Ǵylymi eńbekteri Avtorlar Qoǵamynyń Tóraǵasy Mehmet Nýri Parmaksyz, Qazaqstan Jazýshylar odaǵy basqarmasy Tóraǵasynyń Birinshi orynbasary Aqberen Elgezek, "Qazaq ádebieti" gazetiniń Bas redaktory Dáýren Qýat jáne Qazaqstan Jazýshylar odaǵy Tóraǵasynyń orynbasary Baýyrjan Jaqyp qatysty.
Kezdesý barysynda talqylanǵan negizgi máselelerdi atap aitar bolsaq:
1. Jyl saiyn ǵylym men ádebiet salasyndaǵy bir-eki týyndyny eki taraptan aýdaryp, yntymaqtas elder tilderinde jariialaý;
2. «XXI ǵasyrdaǵy Túrkiia men Qazaqstan avtorlarynyń poeziiasy men áńgimeleri antologiiasyn» birlese daiyndap, eki tilde jariialaý;
3. Qazaqstan men Túrkiia memleketterinde ótetin mádeni jáne shyǵarmashylyq is-sharalarǵa eki taraptan da jazýshylar men aqyndardyń shaqyrylýy;
4. Jylyna bir ret (bir jyl Qazaqstanda, kelesi jyly Túrkiiada) júieli túrde jyr festivalin uiymdastyrý;
5. Balalar ádebieti salasynda yntymaqtastyq ornatý;
6. Jylyna bir ret eki jaqty kelisim aiasynda jazýshylarmen kezdesý kúnderi men kitap tusaýkeserlerin uiymdastyrý.
Qazaq qalamgerleriniń qara shańyraǵy Jazýshylar odaǵynda osy jáne ózge de máseleler talqylanyp, Túbi Túrki týystas elder arasyndaǵy ádebi yntymaqtastyqty damyta túsý jolyndaǵy naqty qadamdar bekitildi.
