Pandemiiadan keiingi kezeńde adamzat órkenietiniń áleýmettik-rýhani damýy úshin álemdik jáne dástúrli dinder liderleriniń róli arta túsedi. Bul týraly Álemdik jáne dástúrli dinder kóshbasshylary sezi hatshylyǵynyń HIH otyrysynda QR Parlamenti Senatynyń Tóraǵasy Máýlen Áshimbaev aitty, dep habarlaidy QazAqparat.
«Aldaǵy ýaqytta da álemdik jáne dástúrli dinder liderleri sezdiń múmkindigi men áleýetin tiimdi paidalanýynyń mańyzy zor. Bul qazirgi kezeńde óte ózekti. Koronavirýs pandemiiasy adamdardyń qalypty ómirin ózgertip qana qoimai áli kúnge deiin álemniń damýyna keri áserin tigizýde. Qazirgi tańda COVID indetinen álem boiynsha 4,5 mln adam kóz jumdy. Odan bólek, ondaǵan mln adamnyń densaýlyǵy syr berdi. BUU keltirgen derekter boiynsha 2020 jyly álemdik ekonomika 4,3 paiyzǵa qysqarǵan. COVID-19 saldarynan álemdik ekonomikaǵa kelgen shyǵyn 3,5 trln dollardan asyp jyǵylady. Dúniejúzinde árbir úshinshi jumys berýshi jumys saǵatyn, al shamamen ár 5-shi jumys berýshi jumysshylaryn qysqartýǵa májbúr bolǵan. Sonyń saldarynan kóptegen elde áleýmettik problemalar ýshyǵyp ketti. Jumyssyzdyq, áleýmettik teńsizdik, qylmys siiaqty keleńsizdikter kóbeidi. Dúniejúzilik banktiń esebi boiynsha pandemiia kedeilik deńgeiinde ómir súretin adam sanyn shamamen taǵy da 100 mln-ǵa kóbeitken», - dedi Senat Tóraǵasy.
Onyń atap ótýinshe, azyq-túlik baǵasynyń ósýi men infliatsiia tabysy tómen elderdegi azyq-túlik qaýipsizdigine aitarlyqtai zardabyn tigizdi.
«BUU baǵalaýyna sáikes, pandemiia saldarynan álemde ashyǵýǵa májbúr adamdardyń sany 83 mln-nan 132 mln-ǵa deiin ósýi yqtimal. Osyndai jahandyq syn-qaterlerge qarsy turý kezinde yntymaqtastyq pen ózara is-qimylǵa eshqandai balama joq. Pandemiianyń basty sabaqtarynyń biri de osy bolýy kerek dep esepteimiz», - dedi Máýlen Áshimbaev.
Senat spikeri pandemiianyń taǵy bir mańyzdy sabaǵy – qoǵamda rýhani jáne adamgershilik qundylyqtardy keńinen dáripteýmen bailanysty ekendigin basa aitty.
«Sondyqtan pandemiiadan keiingi kezeńde adamzat órkenietiniń áleýmettik-rýhani damýy úshin álemdik jáne dástúrli dinder liderleriniń róli arta túsetini anyq», - dedi ol.
