Kollaj: ulysmedia.kz
Májilis depýtaty Edil Jańbyrshin Tsifrlyq damý, innovatsiialar jáne aeroǵarysh ónerkásibi ministri Baǵdat Mýsinnen suraqqa naqty jáne túsinikti tilde jaýap berýdi talap etti, dep habarlady Halyq Uni portaly.
Májilistegi Úkimet saǵatynda depýtat ministrge suraqtarǵa asyqpai jaýap berýge keńes berdi.
«Qurmetti Baǵdat Batyrbekuly, siz suraqtarǵa asyqpai-aptyqpai, qysqa jáne nusqa jaýap berińiz. Munda bizdiń ýaqytymyzdy almańyz. Bul jerde eshkim oinap otyrǵan joq. Sizderge naqty suraq qoiylady, naqty jaýap berińizder. Basyn bastaisyz, aiaǵy joq. Adamnyń basyn ainaldyrmańyz. Parlamentke kelseńizder, durystap jaýap berińizder», - dedi depýtat.
Edil Jańbyrshin týristik ortalyqtarǵa áli internet qosylmaǵanyn, bul qazaqstandyqtardyń qaýipsizdigi úshin mańyzdy ekenin atap ótti.
"Mysaly, týristik infraqurylymdar. Elimizge keletin týrister kóp. Týristik ortalyqtar salynyp jatyr. Ártúrli qoryqtar men ulttyq parkter bar. Ol jaqqa kóptegen adam barady. Endi sol jerdegi másele ýshyǵyp tur. Muny men nege aityp otyrmyn? Bul adamnyń qaýipsizdigine bailanysty másele. Onda kólik buzylýy, adam aýyrýy múmkin. Jalpy ártúrli jaǵdailar bolýy yqtimal", - dedi depýtat.
Osyǵan bailanys depýtat ministr Baǵdat Mýsinge úsh suraq qoidy:
- Birinshiden, Qazaqstannyń týristik infraqurylymyna bailanysty qandai josparlaryńyz bar? Olardy bailanyspen qalai qamtamasyz etesizder?
- Ekinshiden, qandai qarajat esebinen? Qandai tehnologiialar qoldanylady?
- Úshinshiden, jaqynda siz premer-ministrge osy másele, iaǵni ulttyq joba týraly baiandadyńyz. Onyń ishinde joǵaryda aitylǵan máseleler qamtylǵan ba?
Baǵdat Mýsin saýaldarǵa naqty jáne qysqa jaýap berýge tyrysty.
«Úshinshi suraqtan bastaiyn. Bul máseleler qamtylǵan. Týristik nysandar 2027 jylǵa deiin tolyq internetpen qamtylady. Ulttyq joba talqylanyp, bekitilse, qarajat bólinse, týristik nysandar internetpen qamtamasyz etiledi. Tehnologiiaǵa toqtalaiyn. Ár jerde ártúrli tehnologiia paidalanylady. Kóbinese 4G tehnologiiasy nemese optika jelisi tartylmasa, spýtnik tehnologiiasyn qosamyz. (Internetti qamtamasyz etýdiń – avt.) kommertsiialyq kózi bolmaǵandyqtan barlyq shyǵyn biýdjet esebinen qarjylandyrýǵa tiis», - dedi ministr.
