«Kókshetaý qalalyq kópbeiindi aýrýhanasy» ShJQ MKK «Qazaqstannyń Eńbek Eri» ataǵy, Altyn juldyz ben «Otan» ordeni tapsyrylǵan marqum dáriger Oleg Isaev týraly estelik aitty, dep habarlaidy QazAqparat.
Isaev Oleg Nikolaevich 1967 jyly Shyǵys Qazaqstan oblysy, Semei qalasynda týǵan. 1994 jyly Semei memlekettik meditsina institýtyn «Emdeý isi» mamandyǵy boiynsha bitirgen. 2000 jyldan bastap qazirgi ýaqytqa deiin Kókshetaý qalalyq aýrýhanasynda jumys istedi. 2006 jyldan bastap qaitys bolǵansha – anesteziologiia jáne qarqyndy terapiia bóliminiń meńgerýshisi bolǵan. 2010 jyly Qazaqstan Respýblikasynyń densaýlyq saqtaý isiniń úzdigi atanǵan.
«Ujymda jumys istegen ýaqytynda ol ózin joǵary bilikti maman retinde kórsetti. Maqsatty, jigerli, aqkóńil, meiirimdi, uiymdastyrýshy, izdenimpaz boldy. «Anesteziologiia jáne qarqyndy terapiia», «Intensivti terapiia habarshysy» merzimdi basylymdarynda retsenziia men pikirtalastar ótkizdi. Anesteziologtar men reanimatologtar qoǵamynyń jumysyna belsendi qatysty, «Qalalyq aýrýhanada az aǵymdy anesteziiany qoldaný tájiribesi», «Miokard infarktimen aýyratyn naýqastarda trombolizdik terapiia», «Alkogolmen ýlaný», «Jeldetýdiń zamanaýi rejimderi» taqyryptarynda baiandama jasady. EKK ǵylymi-praktikalyq konferentsiialarǵa, patologiialyq jáne anatomiialyq konferentsiialarǵa qatysty. Maqalalary «Meditsina» jýrnalynda, ǵylymi eńbekter jinaǵynda únemi jariialanyp turdy. Oleg Nikolaevich Qazaqstandaǵy anesteziolog dárigerlerdiń ondyǵynda boldy. Kókshetaý qalalyq kópbeiindi aýrýhanasy – biregei, zamanaýi meditsinalyq jabdyqtarmen jabdyqtalǵan meditsinalyq uiymdardyń biri», - dep jazylǵan estelikte.
COVID-19 koronavirýstyq infektsiiasymen kúres bastalǵan sátte-aq Oleg Isaev óziniń kásibi mindetin adal atqardy.
«Kúnine birneshe adam kóz jumǵan sátter de boldy. Oleg Nikolaevich erikti túrde úiinen aýrýhanaǵa kelip, jumys ornynda 12 saǵattan astam turyp, patsientterdiń ómirin saqtap qaldy. Adamdardyń qaiǵy-qasireti men ólimdi kórip, dárigerdiń ózi de psihologiialyq kúizeliske tústi. Saldarynan óz aǵzasynyń qorǵanysh qasietteri tómendedi. Onyń jeke erligi, baǵa jetpes qyzmeti men eńbegi meditsina qyzmetkerleri úshin árdaiym úlgi bolady. Oleg Isaev pandemiiamen kúreste adamdardyń ómirin saqtai otyryp, óz ómirin berdi», - deidi áriptesteri.
