Foto ©Týrar Kazangapov
Adamdar oilanbastan nesie ala bastady. Bul týraly Májiliste «Halyqtyń shamadan tys kredit alýyn azaitý jáne qarjy saýattylyǵyn arttyrý» taqyrybyndaǵy Parlament tyńdaýynda palata tóraǵasy Erlan Qoshanov aitty, dep habarlaidy Kazinform.
«Halyqtyń nesiesin jaba almaýyna qarjy institýttarynyń da úlesi bar dep oilaimyn. Qarjy institýttary tartymdy jarnamalaryn da keńinen jariialap júr. Bul rette, nesie alý protsedýrasynyń jeńildigin eskerip, adamdar qaryzǵa batyp jatyr. Qazir 14-16 jastaǵy jasóspirim de onlain nesie ala alady, iaǵni smartfon men internet arqyly ońai rásimdei salady. Bul jasta qarjylyq jaýapkershilik alǵan durys pa? Keiin bul nesielerdi olardyń ata-analary men ata-ájesi tóleidi», – dedi Qoshanov.
Onyń sózine qaraǵanda, adamdar oilanbastan nesie ala bastady. Keide múldem qajet emes zattar úshin qaryzǵa batady.
«Eki nemese odan da kóp nesie alý ádettegi tájiribege ainaldy. Bir adam mikroqarjy uiymdarynan jiyrmaǵa deiin nesie alǵan jaǵdailar bar. Sosyn osy qaryzdan qutylmaq bolǵandar burynǵysyn jabý úshin jańa nesie alý úshin bankterge qaita-qaita júginýge májbúr. Mundai mysaldar kóp», – dedi Májilis tóraǵasy.
Onyń paiymynsha, qarjy saýattylyǵy kýrsyn mektep pen joǵary oqý oryndarynyń bilim berý baǵdarlamalaryna engizý qajet. Jastar aqshany ornymen jumsaý, biýdjetti josparlaý, investitsiia salý siiaqty bazalyq uǵymdardy meńgergeni jón. Osy jumystyń barlyǵy búkil múddeli organdarmen, qarjy institýttarymen jáne ákimdiktermen birlesip jalǵasyn tabýy tiis.
«Nesie berýge qoiylatyn talaptardy zańnamalyq deńgeide kúsheitý kerek. Qaryzyn ótei almaityn azamattarǵa nesie berýge tyiym salý qajet. Onlain nesie berý salasyn qatań rettegen jón, sondai-aq nesie berýdiń sharttaryn qaita qarastyrý da mańyzdy. Jeke adamdarǵa beriletin nesieler boiynsha shekti paiyzdyq mólsherlemeni tómendetý kerek. Osy nesielerdi kollektorlyq uiymdarǵa satýǵa tolyq tyiym salynýy tiis. Kámeletke tolmaǵan balalary bar otbasylardyń jalǵyz baspanasynan aiyrylyp, kóshede qalýyna jol bermeý qajet. Osynyń barlyǵyn zań júzinde bekitý mańyzdy.
Bul máseleniń sheshiminiń artynda milliondaǵan adamnyń taǵdyry turǵanyn este ustaǵan jón. Sol sebepti búgin halyqtyń shamadan tys qaryz júktemesin tómendetý sharalaryn talqylap, naqty sheshimge kelý kerek», – dedi Erlan Qoshanov.
Budan buryn habarlanǵandai, 1,7 million qazaqstandyq qaryzyn ýaqytyly tólei almai otyr.
