Perri Lott. Foto: Innocence Project
Adam zorlady degen kúdikpen 30 jyl túrmede otyryp shyqqan amerikalyq turǵyn kinásiz bolyp shyqty, - dep habarlaidy Tengrinews.kz saity Innocence Project-ke silteme jasap.
Uiym málimetinshe, amerikalyq Perri Lott 1987 jyly 2 qarashada Oklahoma shtatynda áiel adamǵa shabýyl jasaǵany úshin 1988 jyly uzaq merzimge sottalǵan. Ol kezde áldebir qaskói áieldi jumysynan úiine deiin ańdyp, basyna qarý taqap, zorlap, tonap ketken. Keiin áiel adam qaskóidiń altyn tisi bolǵany esinde qalǵanyn aitqan. Perri Lottyń de altyn tisi bolǵan. Sóitip ol eki kúnnen keiin ustalǵan.
Er adam tergeýshilermen kelisimge óz erkimen kelip, qylmyskerdi taný operatsiiasyna qatysqan. Tergeýshiler operatsiiaǵa birneshe kúdiktini shaqyryp, olarǵa jalǵan altyn tis saldyrǵan. Olardyń ishinde altyn tis tek Lotta bolǵan. Jábirlenýshi áiel kúdikti retinde Lotty tanyǵan. Keiinnen, 2014 jyly áiel sol kezde qatty qobaljyp turǵanyn, onyń tańdaýǵa naqty sebep bolmaǵanyn moiyndaǵan.
Áiel ony zorlaǵan er adam tegis qyrynǵanyn aitqan, al Lottyń murty bolǵan. Alaida Lott qylmyskerdiń basqa belgilerine sáikes kelmese de, kináli dep tanylǵan. Sot aiyptalýshynyń súiiktisi sol túni onymen birge bolǵanyn aitqanyna da mán bermegen.
2010 jyldary Lottyń isin Innocence Project qolǵa alǵan. Júrgizilgen DNQ synaǵy qylmys ornyndaǵy biologiialyq materialdardyń basqa adamǵa tiesili ekenin kórsetti.
