Búgin Parlament Májilisiniń jalpy otyrysynda ekinshi oqylymda maquldanǵan «Halyq densaýlyǵy jáne densaýlyq saqtaý júiesi týraly» Qazaqstan Respýblikasy Kodeksiniń jobasynda transplantologiia máselelerin retteitin normalar pysyqtaldy, dep habarlaidy QazAqparat.
Atap aitqanda, Áleýmettik-mádeni damý komitetiniń qujat boiynsha qorytyndysyna sáikes, Májilis naqty shekteý maqsatynda «tiri donor», «qaitys bolǵan donor», «yqtimal retsipient» uǵymdary engizildi.
«Qaitys bolǵan donordan aǵzalar men tinderdi alý tártibin retteitin túzetýler engizildi. Máselen, donor bolýǵa óziniń kelispeitindigi týraly tiri kezinde erik bildirýi bolǵan kezde, aǵzalardy alý múmkin emes ekendigi kózdeldi. Eger mundai ótinish qaitys bolǵannan keiin bolmasa, onda onyń aǵzalaryn alý tek jubaiynyń (zaiybynyń) jazbasha kelisimimen, al ol bolmaǵan kezde jaqyn týystarynyń kelisimimen ǵana júzege asyrylýy múmkin», - delingen qorytyndyda.
Sondai-aq, mundai kelisimniń qajettiligin patologiialyq anatomiialyq operatsiiaǵa qatysty da belgileý usynyldy. Bul rette patologiialyq anatomiialyq operatsiia mindetti bolyp tabylatyn jaǵdailardyń tizbesi úshke deiin qysqartyldy: óli týý, ana men bala ólimi.
«Sheteldik azamattardyń muqtajdyqtary úshin Qazaqstannan aǵzalar men tinderdi áketý múmkindigi alyp tastaldy. Depýtattar aǵzalardy shetelderde meditsinalyq kómek alatyn Qazaqstan Respýblikasynyń azamattary úshin ǵana áketýdi usyndy», - dep atalyp ótken taratylǵan málimette.
Budan bólek, anatomiialyq syi máselelerin retteitin bap aitarlyqtai pysyqtaldy. Depýtattar anatomiialyq syi retinde jeke basy anyqtalǵan, meditsinalyq uiymda qaitys bolǵandar jáne jerleý úshin 10 kúnniń ornyna 20 kún ishinde suraýy bolmaǵandar ǵana tanylýy múmkin dep belgileýdi usyndy. Bul rette tanylmaǵan máiitter anatomiialyq syi retinde berilmeidi.
