Túrkistan oblysynyń politseileri adam óltirgeni úshin 4 jyldan beri izdeýde júrgen qylmyskerdi Resei astanasy Máskeý qalasynan ustady, dep habarlaidy "Ult aqparat" Túrkistan oblysy Politsiia departamentine silteme jasap.
Saryaǵash APB-niń politseileri TO PD-niń Kriminaldy politsiia qyzmetkerlerimen birge 4 jylǵa jýyq izdestirýde júrgen, asa aýyr qylmys jasaǵan jergilikti turǵyndy ustady.
2015 jyly mamyr aiynda túngi ýaqytta Saryaǵash aýdandyq ishki ister bóliminiń kezekshi bólimshesine aýyldardyń birindegi emhanaǵa «eki aiaǵyna oq tiip jaraqat alǵan» er adamnyń denesi jetkizilgendigi týraly habarlama kelip túsedi.
Tekserý barysynda, bir aýyldyń eki turǵyny arasynda túsinbeýshilik týyndap, sońy eregiske ulasqandyǵy belgili bolady. Bir turǵyn eki tanysynyń kózinshe, eregesken adamdy qos aýyz myltyqpen atyp óltirgen.
Atalǵan jait boiynsha QR QK 99-baby «Adam óltirý» boiynsha qylmystyq is qozǵalǵan.
Asa aýyr qylmys jasaǵan turǵyn tergeýden boi tasalap júrgendikten oǵan halyqaralyq deńgeide izdestirý jariialaidy.
Saryaǵash APB politseileri adam óltirgen kúdiktiniń Resei Federatsiiasynyń Máskeý qalasynda júrgendigin anyqtap, ustalady.
1 shildede ol Reseiden Shymkent qalasyndaǵy ICh-167/11 mekemesine jetkizildi.
Qazirgi tańda Saryaǵash APB tergeý bólimshesi osy qylmystyq iske bailanysty tergeý amaldaryn júrgizýde.
