Adal partiiasynyń Saiasi keńesi prezidenttik Amanat partiiasyna qosylý týraly sheshim qabyldady, dep habarlaidy "Ult aqparat".
Partiianyń áleýmettik jelidegi málimdemesinde Adal múshelerine Memleket basshysy Qasym-Jomart Toqaevtyń jumys stili unaityny jazylǵan.
«Qazir búkil álem jahandyq ekonomikalyq jáne geosaiasi daǵdarysty bastan keshirip jatyr. Aýmaly-tókpeli kezeń bárimizden jyldam beiimdelýdi qajet etedi.
Ýkraina-Resei qaqtyǵysy men odan keiingi geosaiasi teketires, Eýropa territoriiasyndaǵy gýmanitarlyq kataklizmder qazirdiń ózinde dollardyń ósýine, logistikalyq dálizderdi qaita qurylymdaýǵa, energiia tasymaldaýshylardyń rólin qaita qaraýǵa alyp keldi. Reseige qoldanylǵan qatań sanktsiialar bizdiń elge de tikelei áser etip jatyr. Ókinishke orai, qaqtyǵystyń saldary halyqtyń tabysynyń tómendeýine ákelip soǵady», - delingen jazbada.
Saiasi keńestiń pikirine súiensek, syrtqy saiasattaǵy osyndai qaýip-qaterdiń kezinde, kei máselelerge qatysty pikir qaishylyǵyn qoiyp, «bir jaǵadan bas, bir jeńnen qol shyǵaryp», birge qadam jasaityn kezeń týǵan. Dál qazir, tirliktiń kúshi de, bereke kózi de — birlikte.
«Adal partiiasynyń búgingi kúnge deiingi tyń ideialary men zamanaýi tehnologiialyq kózqarastary Prezidentimizge salmaqty qoldaý bola alady dep esepteimiz.
Kez kelgen ózgeriste sabyrly qalpymen salmaqty sheshim qabyldaityn Qasym-Jomart Toqaevtyń jumys stili bizge unaidy. Ol qazir ádiletti memleket qurýdy kózdep otyr. Memleket basshysynyń búgingi Qazaqstan halqyna Joldaýy aiasynda aitqan saiasi reformalary sonyń taǵy bir dáleli.
Biraq bul aitylǵan reformalar qalai júzege asyrylady? Másele osynda. Ol úshin búkil qazaq qoǵamy birigýi qajet. Prezident reformalarynyń jergilikte jerde tiisti deńgeide iske asyrylmai qalý qaýpi joǵary. Qasym-Jomart Kemeluly aitqan «Dostarǵa – bárin, qalǵanyna zań boiynsha» degen qaǵidamen kelgen qoǵamnyń ótkenin umytpaýymyz kerek. Sol úshin, biz, adaldyqtar Jańa Qazaqstandy qurýǵa belsendi qatysyp, elimizdegi oń ózgeriske úles qosqymyz keledi.
Partiialastarymyzben aqyldasa kele, búgin Adal-dyń Saiasi keńesinde prezidenttik Amanat partiiasyna qosylý týraly biraýyzdan sheshim qabyldadyq.
Partiia janashyrlaryna aitarymyz, osy ýaqytqa deiin halyqtyń tabysyn arttyrý, ár aýyldyń mamandaný kartasyn ázirleý, ákimderdi ádistemelik qoldaý jáne basqa da partiia músheleriniń aldynda alǵan mindettemelerimizdi tolyq oryndaimyz. Oǵan kúmán bolmasyn. Bilik partiiasymen birikkennen keiin bastamalarymyz tyń serpin alyp, halyq igiligin kóredi dep senemiz. Bizdiń sheshimimizge ózge de áriptesterimiz ben partiialastarymyz, partiia janashyrlary qoldaý bildiredi dep úmittenemiz! «Amanat»-pen birge alar asýymyz alda!», - delingen partiianyń resmi habarlamasynda.
