Videodan kadr: youtube.com/erbolseilkhan
Depýtat-zańger Abzal Quspan stalking pen qyz alyp qashý isteri boiynsha zań normalarynyń is júzinde durys qoldanylmai otyrǵanyn aitty. Onyń sózinshe, bul baǵyttaǵy basty másele — azamattardyń da, quqyq qorǵaý organdarynyń da óz mindeti men quqyǵyn tolyq bilmeýi, dep habarlaidy Ult.kz.Abzal Quspan 2025 jyldyń kókteminde Úkimetke atalǵan máselelerge qatysty keshendi jospar ázirleý jóninde hat joldaǵanyn atap ótti. Depýtattyń aitýynsha, kóptegen jábirlenýshiler, sonyń ishinde marqum Nurai da óz quqyǵyn jetkilikti deńgeide bilmegen. Eger stalking nemese qyz alyp qashý áreketteriniń Qylmystyq kodekstiń 125-babynyń 1-bóligi (Adam urlaý, red.) aiasynda qaralatynyn jábirlenýshi tarap ta, onyń týystary da, politsiia qyzmetkerleri de naqty bilgende, qaiǵyly jaǵdaidyń aldyn alýǵa bolar edi.
"Óitkeni kóp jábirlenýshiler jáne marqum bolyp ketken qyzymyz Nurai óz quqyǵyn bilgen joq. Ol eger óz quqyǵyn jetkilikti bilse jaǵdai basqasha bolar ma edi?" - dedi Quspan.
Depýtattyń pikirinshe, qarapaiym azamattardyń quqyqtyq normalardy bilýge mindetti emestigin eskerý qajet. Al quqyq qorǵaý organdary zańdy durys qoldanýshy retinde bul talapty tolyq oryndamaǵan. Sondyqtan stalking pen qyz alyp qashý sekildi qylmystarǵa qatysty zańnamany túsindirý jumystaryn keńinen júrgizý asa mańyzdy.
Abzal Quspan bul normalardyń ótken jyly kúshine engenin eske sala otyryp, olar aýyr jáne asa aýyr qylmystardyń aldyn alý maqsatynda qabyldanǵanyn aitty. Alaida praktikada zańdy qoldanýda olqylyqtar bar ekenin atap ótti. Depýtattyń sózinshe, ár azamat óz quqyǵyn bilip, al politsiia qyzmetkeri óz mindetin naqty oryndaǵan jaǵdaida, mundai oqiǵalardyń aldyn alýǵa tolyq múmkindik bar.
"Ony quqyq qorǵaý organdary quqyq qoldanýshy retinde myna zańdy durys qoldanǵan joq. Osy baǵytta bizde zańdy durys túsindirý jumystaryn keńinen júrgizý kerek. Onysyz bolmaidy. Eger ár azamat óz quqyǵyn bilip tursa, ekinshi kezekte sol aryzdy qabyldaǵan politsiia qyzmetkeri óz mindetin bilip tursa, onda árine mundai oqiǵanyń aldyn alýǵa bolatyn edi", - dedi depýtat Abzal Quspan.
