Nursultan Nazarbaev Qazaqstanǵa resmi saparmen kelgen Abý-Dabidiń taq murageri, Birikken Arab Ámirlikteriniń Qarýly Kúshteri Joǵarǵy Bas qolbasshysynyń orynbasary, sheih Muhammed ben Zaid Ál Nahaianmen kezdesti, dep habarlaidy "Ult aqparat" Aqordaǵa silteme jasap.
Resmi qarsy alý rásimi aiaqtalǵannan keiin taraptar eki el arasyndaǵy yntymaqtastyq pen bailanystardy odan ári damytýdyń ózekti máselelerin talqylady.
Áńgimelesý barysynda Memleket basshysy Qazaqstan men Birikken Arab Ámirlikteri arasynda berik dostyq qarym-qatynas ornaǵanyn aityp, taq muragerine jumys kestesiniń tyǵyzdyǵyna qaramastan, elimizge resmi saparmen kelgeni úshin rizashylyq bildirdi.
– Eki jaqty dostyq qatynastardyń arqasynda elderimizdiń biznes jáne memlekettik qurylymdary arasyndaǵy yntymaqtastyq damyp keledi. Saýda-sattyq kólemi 2 ese ósti. Biz investitsiiany qorǵaý jáne salyq salý salasynda ýaǵdalastyqtarǵa qol jetkizdik, – dedi Qazaqstan Prezidenti.
Sondai-aq, Nursultan Nazarbaev sý energetikasy, gaz jáne himiia keshenin turǵyzý salalaryndaǵy jobalardy odan ári iske asyrý máselelerine toqtaldy.
Memleket basshysy Birikken Arab Ámirlikteriniń ǵylym men tehnologiiany damytý úshin atqaryp jatqan jumystaryn atap ótip, eki el arasynda engizilgen vizasyz rejimniń tiimdiligin aitty.
Qazaqstan Prezidenti Birikken Arab Ámirlikteriniń qoldaýymen qolǵa alynǵan áleýmettik jáne infraqurylymdyq jobalardyń iske asyrylý barysyna toqtaldy.
Abý-Dabidiń taq murageri Qazaqstan Prezidenti Nursultan Nazarbaev pen sheih Zaid ben Sultan Ál Nahaiannyń kúsh-jigerleriniń arqasynda eki el arasynda dostyq ári tyǵyz bailanystar qalyptasqanyn atap ótti.
– Elderimiz arasynda baýyrlastyq qatynas ornaǵan. Biz Sizdi úlken aǵamyz dep sanaimyz. Ómirlik tájiribeńiz mol. Sizdi qurmet tutamyz. 30 jyl buryn Qazaqstan osyndai ózgeristerdi bastan ótkeredi dep eshkim kútpegen edi. Qazir Qazaqstan – kóshbasshy el, óńirdegi jetekshi memleketterdiń biri. Osynyń bárine Sizdiń kóregendigińiz ben paiym parasatyńyzdyń arqasynda qol jetkizildi, – dedi sheih Muhammed ben Zaid Ál Nahaian.
Taq murageri Sheih Muhammed ben Zaid Ál Nahaian eki jaqty qatynastardy ilgeriletýdiń mańyzdylyǵyn atap ótip, Qazaqstannyń ári qarai ósip-órkendei berýine tilektestik bildirdi.
Kezdesý barysynda Memleket basshysy Abý-Dabidiń taq muragerine onyń ákesi sheih Zaid ben Sultan Ál Nahaiannyń Qazaqstanda basyp shyǵarylǵan «Birigýdiń kúsh-qýaty» atty kitaby men «Astanaǵa 20 jyl» mereitoilyq medalin syilady.
***
Sheih Muhammed ben Zaid Ál Nahaiannyń Qazaqstan Respýblikasyna resmi saparynyń qorytyndysy boiynsha mynadai qujattarǵa qol qoiyldy:
– Qazaqstan Respýblikasy men Birikken Arab Ámirlikteri arasyndaǵy Sottalǵan adamdardy berý týraly shart;
– Qazaqstan Respýblikasynyń Mádeniet jáne sport ministrligi men Birikken Arab Ámirlikteriniń Mádeniet jáne bilimdi damytý ministrligi arasyndaǵy Mádeniet salasyndaǵy yntymaqtastyq týraly kelisim;
– Qazaqstan Respýblikasynyń Aqparat jáne kommýnikatsiialar ministrligi men Birikken Arab Ámirlikteriniń «Saýab» radikalsyzdandyrý halyqaralyq ortalyǵy arasyndaǵy yntymaqtastyq týraly memorandým.
