Qazaqstannyń halyq jazýshysy, memleket jáne qoǵam qairatkeri Ábish Kekilbaiulynyń shyǵarmalary álemniń 16 tiline aýdaryldy.
Bul týraly búgin «Ábish álemi» atty oqý kongresinde QR Mádeniet jáne sport ministri Aqtoty Raiymqulova aitty, dep habarlaidy QazAqparat.
Saltanatty sharada Memlekettik hatshy Qyrymbek Kósherbaevtyń quttyqtaý hatyn oqyp bergen Mádeniet jáne sport ministri jinalǵandarmen aqjoltai jańalyqtarymen bólisti.
«Abyz aǵamyzdyń shyǵarmalary álemniń 16 tiline, sonyń ishinde biyl «Ańyzdyń aqyry» romany orys, aǵylshyn, frantsýz tilderine aýdaryldy. Ábish aǵanyń shyǵarmashylyǵyn nasihattaý maqsatynda elimizde kóptegen sharalar atqaryldy. Sonyń ishinde Ábish Kekilbaevtyń «Ańyzdyń aqyry» romany Qazaqstan Respýblikasynyń Ulttyq akademiialyq kitaphanasynyń eń úzdik jobalarynyń biri «Bir el – bir kitap» respýblikalyq aktsiiasy aiasynda jalpyhalyqtyq oqýǵa ie boldy. 4 myńnan astam otandyq kitaphanany qamtyǵan bul joba aiasynda 700 myńnan astam oqyrman Ábish aǵamyzdyń shyǵarmasyn oqydy»,- dedi Aqtoty Raiymqulova.
Bul rette kitaptyń oqyrmanǵa jetýine dáneker bolatyn qasietti oryn – kitaphananyń, kitap pen avtordy kezdestiretin rýhani ordanyń shyraqshylary – kitaphanashylardyń eńbegine erekshe toqtalǵan ministr aldaǵy jyldan sala qyzmetkerleriniń jalaqysy 50 paiyzǵa ósetinin aitty.
Jazýshynyń ádebieti men shyǵarmashylyǵyn, qazaq ádebietiniń qundylyqtaryn halyqaralyq ǵylymi bilim berý júiesinde nasihattaý jáne kópshilikke taratýdy maqsat tutqan kongress aiasynda Ábish Kekilbaiulynyń 20 tomdyq kitaptarynyń tusaýkeseri ótti.
Saltanatty sharaǵa filologiia ǵylymdarynyń doktory, professor, jazýshy Myrzatai Joldasbekov, Qazaqstan Jazýshylar odaǵynyń basqarma tóraǵasy Ulyqbek Esdáýlet, jazýshy, QR Memlekettik syilyǵynyń laýreaty Tólen Ábdik, synshy, ádebiettanýshy, memleket jáne qoǵam qairatkeri Sultan Orazalinov syndy tanymal tulǵalar qatysty.
