Memleket basshysy Aqtaý qalasyna jumys saparmen baryp, jazýshy, qoǵam jáne memleket qairatkeri Ábish Kekilbaidyń 80 jyldyq mereitoiy aiasynda ornatylǵan eskertkishiniń ashylý rásimine qatysty. Qasym-Jomart Toqaev qalamgerdiń músinin saltanatty túrde ashyp berdi, dep jazady Aqorda.
Taý tulǵaly talant, ǵulama oishyl Ábish Kekilbaiulynyń eren eńbegi qandai qurmetke de laiyq ekenin aitqan Qasym-Jomart Toqaev, zańǵar jazýshy, asa kórnekti memleket jáne qoǵam qairatkeriniń rýhyna taǵzym etý tek Mańǵystaý óńiriniń ǵana emes, búkil elimiz úshin mańyzdy oqiǵa dep baǵalady.
– Biz búgin rýhyn ulyqtap otyrǵan Ábish Kekilbai – adamzattyq bolmystyń joǵary deńgeiine kóterilgen birtýar tulǵa, qazaq halqynyń uly perzenti. Halqymyzdyń maqtanyshyna ainalǵan azamattardyń esimin jadymyzdan shyǵarmaý – barshamyzdyń paryzymyz. Elbasynyń «Shirkin-ai, osyndai qazaqtar kóbirek bolsa eken» dep Ábish aǵaǵa rizashylyq bildirýi tegin emes. Ziialy qaýym oǵan airyqsha qurmet kórsetip, «Qazaqtyń tańdaiy» dep atady, – dedi Qazaqstan Prezidenti.
Memleket basshysy «Qazaqstannyń Eńbek Eri» ataǵyna ie bolǵan tuńǵysh qalamgerdiń ádebiet álemine kelgennen bastap ulttyq sanany saqtaý úshin mol úles qosqanyna, ana tilimizdi, salt-dástúrimizdi jáne tól mádenietimizdi dáriptep, halqyna adal qyzmet etkenine toqtaldy. Ulttyq bolmys pen ulttyq rýh Á.Kekilbai shyǵarmashylyǵynyń dińgegine ainalǵanyn aitty.
– «Ańyzdyń aqyry», «Eleń-alań», «Úrker», «Shyńyraý» – qaitalanbas týyndylar. Klassik qalamgerdiń bul eńbekteri álem ádebietiniń altyn qoryna tiesili. Jazýshy qara sózdiń qudireti arqyly eldiń namysyn oiatyp, rýhyn kóterdi,– dep baǵa berdi Qasym-Jomart Toqaev.
Prezident memleketimizdiń jetistikteri qalamgerdiń ult taǵdyry týraly maqalalarynda tolyq kórinis taýyp, qoǵamnyń shynaiy sipatyn tanytqan Ábish Kekilbaiulynyń kósemsózi halyqtyń rýhani azyǵyna ainalǵanyn, zańǵar jazýshynyń týyndylaryna tarih pen táýelsizdiktiń arqaý bolǵanyn tilge tiek etti.
– Onyń bilimi, kózqarasy, shyn máninde, sheksiz, biregei jáne ámbebap. Ábish Kekilbai – qazaqtyń bolmys-bitimine álemdik keńistikten kóz salǵan kemel oidyń iesi. Uly Abai «Óldi deýge bola ma, oilańdarshy, Ólmeituǵyn artynda sóz qaldyrǵan» deidi. Ábish Kekilbaidyń shyǵarmalary ǵasyrdan ǵasyrǵa ulasatyn rýhani qundylyq bolyp qalatyny sózsiz,– dedi Memleket basshysy.
Qasym-Jomart Toqaev Ábish Kekilbaiulynyń ǵulama jazýshy ǵana emes, asa kórnekti memleket jáne qoǵam qairatkeri ekenin, Elbasynyń senimdi serigi retinde Táýelsiz Qazaqstannyń negizin qalaýǵa qosqan úlesi orasan zor dep atap ótti.
Memleket basshysy jazýshynyń elimizdegi joǵary laýazymdarda qyzmet istep, halyqtyń yqylasyna bólengenin, Joǵarǵy Keńes tóraǵasy, Memlekettik hatshy, Senator qyzmetterin abyroimen atqarǵanyn aitty.
– Ábish Kekilbai Táýelsizdigimizdi qorǵaýǵa jáne nyǵaitýǵa atsalysqan asa kórnekti qoǵam qairatkeri bolǵanyna eshqandai kúmán joq. Óitkeni ol qazaqtyń oi-sanasyn jańǵyrtqan uly ózgeristerdiń basy-qasynda júrdi. Kórnekti qairatker egemen elimizdiń tarihi shejiresinde óz qoltańbasyn qaldyrdy. Onyń «Táýelsizdik – tátti sóz ǵana emes, ulttyq jaýapkershilik» degen tujyrymy barshaǵa oi salady,– dedi Memleket basshysy.
Qasym-Jomart Toqaev Ábish Kekilbaiuly el múddesin bárinen de biik qoiǵan naǵyz patriot, sanaly ǵumyryn eline qaltqysyz qyzmet etýge arnaǵan ardaqty azamat, barsha jurtqa ultjandylyqtyń ozyq úlgisin kórsetken tulǵa ekenin aita kele, qazirgi qazaqstandyq patriotizm úsh tuǵyrǵa negizdelýi kerek dep sanaitynyn málim etti.
– Birinshi, patriotizm tól tarihymyz ben shyqqan tegimizdi tereń uǵynýdan bastalady. Halqymyzdyń basynan ótken qily zamandy jáne el eńsesin kótergen jetistikterdi jas urpaqtyń bilgeni óte mańyzdy. Túp-tamyrymyz myńjyldyqtarǵa ulasady. Muny maqtanysh sezimmen aitý – paryz,– dedi Qasym-Jomart Toqaev.
Sondai-aq ol tarihymyzǵa qatysty kóptegen derekterdi jaryqqa shyǵarý qajettigine, azattyq úshin kúresken arystarymyzdyń esimin ulyqtaý arqyly azamattarymyzdyń, ásirese, jastardyń boiyna otanshyldyqty daryta alatynymyzǵa mán berdi.
– Ekinshi, patriotizm memleketimizdi jáne memlekettik institýttardy qurmetteýden bastalady. Memleketimizdiń qazirgi qundylyqtaryn baǵalaý – barshamyzǵa ortaq mindet. Bereke men birlik, turaqtylyq pen tynyshtyq, tatýlyq pen kelisim – bizdiń basty bailyǵymyz. Kópshilik, ásirese, jastar memleket bolmasa, ult bolmaitynyn uǵynǵany jón. Búgingi býyn túrli qaýesettiń jetegine ermei, el irgesiniń bútindigin saqtaýǵa atsalysýy kerek, – dedi Qazaqstan Prezidenti.
Memleket basshysy «Qazaqstan patriotizmi» uǵymy bárimiz úshin ulttyq qundylyq bolýy qajet ekenine, búkil ideologiia Otandy sheksiz súiýge baǵyttalý kerektigine toqtalyp, elimizdegi jastar uiymdaryn osy igi bastamaǵa jumylýǵa shaqyrdy.
– Úshinshi, bizdiń maqsatymyz – eń damyǵan memleketterdiń qataryna qosylyp, álemdegi laiyqty ornymyzdy alý. Otansúigishtik – jai ǵana uran tastaý emes. Qazirgi tańda bul bilim alý, ǵylymǵa umtylý, innovatsiia men tehnologiiany igerý arqyly júzege asady. Búgingi zaman – bilektiniń emes, bilimdiniń, iaǵni, aqyl-oi básekesiniń zamany,– dedi Qasym-Jomart Toqaev.
Prezident jastarymyz Qazaq elin búkil dúniejúzine tanytatyn jobalar men bastamalardy júzege asyrýǵa talpynýy kerek dedi. Sonda ǵana otanshyl, ultjandy urpaqty jańa geosaiasat, geoekonomika jaǵdaiyna beiimdei alatynymyzdy aitty. Qazaqstan patriotizmi osyndai úsh tuǵyrǵa negizdelse, táýelsizdigimizdiń nyǵaiyp, elimizdiń jarqyn bolashaǵyna jol ashatynyna toqtaldy.
Memleket basshysy qazaq ziialylarynyń salmaqty sózi – tárbieniń tiimdi quraly dep erekshe ekpin berdi.
– Búgingi kúni ziialy qaýymnyń mańyzdy mindeti óskeleń urpaqty patriottyq rýhta tárbieleý dep sanaimyn,– dedi Qasym-Jomart Toqaev.
Qazaqstan Prezidenti sóz sońynda Ábish Kekilbaiulynyń «Urpaǵyna ie bola almaǵan jurt ulttyqtan aiyrylady» degen sózi árdaiym esimizde turatynyn aityp, jazýshynyń mol murasy, ónegeli taǵylymy osy maqsatqa qyzmet ete beretinine senim bildirdi.
