«Nazarbaev» Ýniversitetinde ótip jatqan Self-made forýmy aiasynda qazaqtyń áigili sýretshisi Ábilhan Qasteevtiń shóberesi Aisánim qazaqy naqyshtaǵy kiim úlgilerin tanystyrdy, dep habarlaidy QazAqparat tilshisi.
«Qazaq ulttyq ýniversitetinde 4-kýrsta oqimyn. Mamandyǵym - kostiým sýretshisi. Osy mamandyǵym boiynsha qazaqy naqyshtaǵy kiimder tigýdi qolǵa alǵanyma bir jyl boldy. Osy shyǵarmashylyq jumystarym arqyly qazaqtyń salt-dástúrin álemge tanytqym keledi. Máselen, myna kostiýmde uzatylatyn qazaq qyzy sýrettelgen. Kelesi kiimde sáýkele kigen qazaq qyzynyń toiǵa daiyndalyp jatqany beinelengen», - dedi forým aiasynda uiymdastyrylǵan kórme barysynda jumystaryn tanystyrǵan Aisánim Qasteeva.
Á.Qasteevtiń shóberesi munan da ózge ideialarynyń bar ekenin, alaida ony júzege asyrýǵa qarajat qol bailaý bolyp otyrǵanyn aitty. Osy rette Jastar jylynan kúteri kóp ekenin atap ótti.
«Úkimet nemese túrli qoǵamdastyqtar tarapynan qoldaý bolsa, halyqqa qajetti dúnielerdi jasap shyǵaratyn edim. Armanym - qazaqtyń áigili sýretshisi, beineleý óneriniń negizin salýshylardyń biri, atam Ábilhan Qasteevtiń óner jolyn jalǵastyrý. Bolashaqta aǵylshyn tiline basymdyq berý arqyly balalardy shyǵarmashylyqqa baýlityn ortalyq ta ashqym keledi», - dedi Aisánim Qasteeva.
