Foto: QR MAM
2025 jyldyń 18 shildesinde Ábilhan Qasteev atyndaǵy QR Memlekettik óner mýzeiinde «Mereitoi ieleri - 2025» kórmesiniń ashylý saltanaty ótti, dep habarlaidy Ult.kz.
Ekspozitsiiada beineleý óneriniń damýyna eleýli úles qosyp, elimizdiń mádeni ómirinde óshpes iz qaldyrǵan sýretshilerdiń týyndylary jinaqtalǵan. Bul kórmede HH ǵasyrda qazaqstandyq beineleý óneri mektebiniń qalyptasý kezeńinde eńbek etken ár býyn ókilderiniń shyǵarmashylyǵy toǵysyp jatyr. Olardyń qatarynda Hlýdov Nikolai, Antoshenko-Olenev Valentin, Kapterev Valerii, Glebova Tatiana jáne t.b. bar.
Nikolai Hlýdov Qazaqstanǵa XIX ǵasyrdyń sońynda kelgen. Onyń shyǵarmashylyǵy XIX ǵasyrdaǵy realistik keskindeme mektebi qazaq jerinde keńinen tanylyp, jalǵasyn tabýyna yqpaly zor boldy. Sýretshi kóp jerge saiahattap barǵan, sonyń nátijesinde turmys pen tabiǵat kórinisterin beineleitin keskindemelik týyndylar jazdy.
Foto: QR MAM
Qazaqstannyń beineleý ónerinde Qazaq KSR-iniń halyq sýretshisi Moldahmet Kenbaevtyń shyǵarmashylyǵy erekshe oryn alady. Ol – shetelde akademiialyq kórkem bilim alǵan alǵashqy qazaq sýretshileriniń biri. Onyń týyndylary tereń mazmunymen jáne ulttyq bolmysymen erekshelenedi. Hakimjan Naýryzbaev – ulttyq músin óneriniń negizin qalaýshy, Qazaqstan Respýblikasynyń halyq sýretshisi. Ol mádeniet pen óner qairatkerleriniń portretter galereiasyn jasap, eńbek erleriniń kelbetin qaǵazǵa túsirip úlgergen. Valentin Antoshenko-Olenev – respýblikadaǵy asa kórnekti grafik-sýretshilerdiń biri bolǵan. Onyń shyǵarmashylyǵy janr, taqyryp jáne kóńil-kúi turǵysynan alýan túrli. Sýretshiniń súiikti tehnikasy – aq-qara linograviýra. Bul ádis arqyly ol túrli taqyryptardy sheber beinelegen.
Bul kórme qylqalam sheberlerine kórsetilgen qurmet qana emes, sonymen qatar olardyń kózqarasymen sol dáýirge oralýǵa múmkindik berdi. Olardyń shyǵarmashylyq murasy óshpeidi, shabyt silap, júrekti tebirentip, ótkenniń únin birneshe uraqqa jetkizedi. Eń bastysy, sheksiz ýaqyt pen keńistiktegi adamnyń bolmysyn eske túsiredi.
Ekspozitsiia 2025 jyldyń 18 tamyzyna deiin jalǵasady.
