Qoǵam qairatkeri Murat Ábenov Ulttyq qoǵamdyq keńestiń jumysy saiasi máselelermen ǵana shektelmeý kerek degen pikirde. Bul týraly ol ortalyq kommýnikatsiialar ortalyǵynda ótken brfing barysyndai aitty, dep habarlaidy "Ult aqparat".
«Keńestiń qurylýynyń qajettigin bárimiz túsinip otyrmyz. Jańa ǵana keńestiń quramyn qarap shyqtym. Maǵan ár túrli saladan, ár túrli saiasi partiialardan ókilder bar bolǵany unady. Meniń oiymsha, bul uiym anda-sanda, 2-3 aida bir ret resmi jiyn ótkizetin resmi joldan tartynyp, qoǵamdaǵy eń ózekti máselelerdi talqylaityn alań bolýy kerek. Keńestiń jumysy tóńireginde tek qana saiasi máseleler emes, áleýmettik máseleler de talqylanatyny unady. Bul bizge memlekettik baǵdarlamalardy saraptap, taldap, usynys berip, kemshilikter bolsa birden aityp, problemanyń ýshyǵyp, kúsheiip ketýine jol bermei, der kezinde durys usynystar jasaýǵa múmkindik beredi», - dedi ol.
Qoǵam qairatkeri belsendi azamattardyń oi-pikiri memlekettik organdar tarapynan eskerilmei jatqanyn aitady.
«Qazir bizdiń azamattar óte belsendi. Biraq, ókinishke orai, memlekettiń organdarynyń basshylarymen tikelei bailanys jasaýǵa kóbiniń múmkindigi joq. Keibir ministrlik ashyq, jariialy túrde jumys istese, keibir memlekettik organdardyń basshylary jabyq jumys júrgizedi. Meniń oiymsha, keńes músheleri el aldyndaǵy jaýapkershiligin túsine otyryp, osy keńestiń ókilettiligin paidalanyp, óz salalary boiynsha kóptegen kúrdeli máselelerdiń tiimdi sheshilýine atsalysýy kerek», - deidi ol.
Murat Ábenov qazir kóptegen ózekti máseleler tek áleýmettik jeli alańynda ǵana aitylyp kele jatqanyn da tilge tiek etti.
«Kóp azamattar máselelerin qaida aitaryn bilmei, áleýmettik jelimen shektelip júrgen edi. Memlekettik baǵdarlamalardyń tiimsizdigin memleket basshysy da synady. Kóbinese baǵdarlamalardy talqylaý jabyq túrde, ministrlik janynda ǵana ótedi. Sondyqtan, oǵan qatysty syn áleýmettik jeli deńeiinde ǵana qalyp keldi. Qoǵamdyq keńesterdiń jumysynda bul qarastyrylǵanymen, olardyń ministrlik janynan qurylǵanyn umytpaý kerek. Bul keńes tek máselelerdi talqylap qana qoimai, eldegi pikirtalasty taldaityn bolady», - dedi qoǵam qairatkeri.
