Qyzylorda oblysynyń ákimi Gúlshara Ábdiqalyqova áleýmettik jelide taraǵan videoǵa qatysty málimdeme jasady, dep habarlaidy Sputnik Qazaqstan.
Buǵan deiin Jańaqorǵan aýdanynyń turǵyny Qyzylorda oblysynyń ákimi keledi dep joldy jaýyp tastaǵanyn aityp, video jariialaǵan bolatyn.
Ábdiqalyqovanyń aitýynsha, aimaq basshysy da, aýdan ákimi de joldy jabýǵa eshqandai tapsyrma bermegen.
"Búgin Jańaqorǵan, Shieli aýdandaryndaǵy aýrýhanalardy aralap, dári-dármekpen, ottegimen qamtamasyz etý máselelerin qarap jatyrmyn. Osyndai issapar kezinde Jańaqorǵan aýdany infektsiialyq aýrýhanasynyń qasynda Sandýǵash Turlybekova degen áiel maǵan kelip, joldyń jabylǵanyn aitty", - dedi oblys ákimi.
Sonymen qatar ol osy istiń mán-jaiyn anyqtaýdy oblystyq politsiia departamenti basshysyna tapsyrǵanyn jetkizdi.
"Men joldy jabý týraly tapsyrma bergen joqpyn, aýdan ákimi de eshqandai tapsyrma bermedi. Sol jerdegi ishki ister bóliminiń basshysy da ondai tapsyrma berilmegenin aityp otyr. Bul ýchaskelik politsiianyń sheshimi bolsa, onyń is-áreketine qatysty oblystyq departament basshysy Sultan Bektórege tapsyrma berdim", - dedi Ábdiqalyqova.
Endi politsiia departamenti ýchaskelik politsiianyń is-áreketi qanshalyqty durys ekenin, qandai kemshilik jibergenin anyqtaidy.
Aita keteiik, jelide taraǵan videoda Jańaqorǵan kentiniń turǵyny Ábdiqalyqovanyń aldynan shyǵyp, oblys ákimi bolasyz ba dep naqtylap suraidy. Sodan keiin qoǵamdyq kólik jarty joldan tastap ketkenin, joldyń jabylǵanyn aitady.
"Siz osynda kele jatyrmyn dep joldy japtyrdyńyz ba? Bizdi joldan túsirip ketti. Joldy japtyratyn hannyń qyzysyz ba? Nege kele jatqanda osylai jasaisyzdar? Halyqty qorlaisyzdar, halyqpen birge emessizder", - degen bolatyn oblys turǵyny.
Videoda oblys ákimi joldy japtyrmaǵanyn aitqan.
