2020 jyldyń 8 qańtarynda elordadaǵy «Qazaqstan» ortalyq kontsert zalynda Hakim Abaidyń 175 jyldyq mereitoiyna arnalǵan saltanatty shara ótedi. Bul týraly QR Memlekettik hatshysy Qyrymbek Kósherbaev aitty, dep habarlaidy QazAqparat.
«Aldymyzda kele jatqan 2020 jyl elimiz úshin erekshe rýhani oqiǵalar kezeńine ainalǵaly otyr. Halqymyzdyń uly oishyly, aqyn Abai Qunanbaiulynyń 175 jyldyǵy men dala danyshpany, adamzattyń ekinshi ustazy Ál-Farabidiń 1150 jyldyq mereitoilaryn joǵary deńgeide atap ótý bizdiń eldigimizdi, egemendigimizdi, eńseli memlekettigimizdi aishyqtaityn bolady. Ulylarymyzdy ulyqtap, danalarymyzdy tórge ozdyrý – halqymyzdyń mereiin ústem etetin igilikti dást úr. Biz osy uly tulǵalar arqyly qazaq dalasynda ejelden órkeniettiń, bilim men ǵylymnyń, ádebiettiń órken jaiǵanyn búkil álemge jan-jaqty pash etetin bolamyz. Sondyqtan bul mereitoilar bárimiz úshin árine úlken syn, tarihi jaýapkershilik», - dedi Memlekettik hatshy Abaidyń 175 jyldyq mereitoiyn daiyndaý jáne ótkizý jónindegi memlekettik komissiia otyrysynda.
Osy oraida, ol mereitoilardy daiyndaý jáne ótkizý jónindegi eki komissiianyń jumysy mazmundyq jaǵynan sáikes kelgendikten jáne ýaqytty tiimdi paidalaný maqsatynda birge ótkizilip otyrǵandyǵyn eskertti.
«Memleket basshysynyń tapsyrmasyna sáikes, biz búgingi bas qosýymyzda 2020 jyly osy eki mereitoidy ótkizýdiń jalpy respýblikalyq josparlaryn bekitiýimiz kerek. Josparlardyń jobasy jergilikti jáne ortalyq atqarýshy organdarynda, Úkimette jáne Prezident Ákimshiliginde aldyn ala talqylandy», - dedi ol.
Otyrystyń birinshi bóliginde Abaidyń 175 jyldyq mereitoiyn ótkizý jáne daiyndaý máseleleri talqylandy.
«Hakim Abaidy ulyqtaýǵa baǵyttalǵan is-sharalardyń bastaýy aldaǵy jyldyń 8 qańtarynda Nur-Sultan qalasynda «Qazaqstan» ortalyq kontsert zalynda saltanatty sharamen ashý usynylyp otyr. Sondai-aq, negizgi mereitoilyq sharalar Uly Abaidyń kindik qany tamǵan qasietti Semei óńirinde atalyp ótilmek. Osy jáne ózge de irgeli is-sharalar jalpy respýblikalyq josparynyń jobasynda qarastyrylǵan», - dedi Qyrymbek Kósherbaev.
