Abaidyń 175 jyldyǵyn toilaýǵa bólingen, alaida pandemiiaǵa bailanysty únemdelgen 1,7 mlrd teńge qaida jumsaldy? Bul suraqqa Mádeniet jáne sport ministri Aqtoty Raiymqulova jaýap berdi, dep habarlaidy "Ult aqparat".
«Shynynda da, únemdelgen qarajat respýblikalyq biýdjetke qaitaryldy. Sebebi karantinge bailanysty sharalardyń kóbi qysqartyldy. Jyl basynda oflain sharalardyń birazy josparlanǵan edi. Únemdelgen qarajat Shyǵys Qazaqstannyń infraqurylymyn damytýǵa, Semeidegi negizgi mýzeidi órkendetýge, Ahmet-Riza meshitin restavratsiialaýǵa, sondai-aq Jidebai-Bórili memlekettik tarihi-mádeni jáne ádebi-memorialdyq qoryq-mýzeiin damytýǵa jumsaldy. Álbette Abai ómirine qatysty barlyq tarihi oryndardy restavratsiialaý jumysy umyt qalǵan joq. Iaǵni Prezident atap ótkendei, bul qarajatty bastysy infraqurylymǵa bóldik. Sondai-aq kitaptardy, Abaidyń shyǵarmalarynyń 10 tildegi 10 tomdyǵyn shyǵarýǵa qarajat bólindi», - dedi Aqtoty Raiymqulova OKQ-da ótken baspasóz máslihatynda.
Ministr Semeidegi Abaidyń uldarymen birge turǵan eskertkishin qala ákimdigi ornatqanyn jetkizdi.
«Eskertkishke qansha ketkenin jergilikti ákimdik biledi. Bul – sol jergilikti biliktiń bólingen qarajatymen jasalǵan eskertkish», - dedi ol.
