Abaidyń «Jidebai-Bórili» memlekettik qoryq-mýzeii qyzmetkerleriniń ǵylymi issapary barysynda Qazan qalasynan qundy qazyna tabyldy, dep habarlaidy "Ult aqparat" qoryq-mýzeiiniń baspasóz qyzmetine silteme jasap.
«Bul - 1885 jyly Abai Qunanbaiuly tóbe bi bolǵan Qaramola sezinde qabyldanǵan jarǵynyń 1886 jyly Qazan qalasynan shyqqan basylymy. «Qaramola jarǵysy» HIH ǵasyrdaǵy adam quqyqtarynyń saqtalýy men bostandyǵy haqynda Abaidyń ózi qurastyryp shyǵarǵan, halyq arasyna keń taralǵan erejelerdiń biri. Bul qujattyń qabyldanýy men el arasyna taralýy týraly derekter men estelikter óte kóp. Qazirgi grafikaǵa aýdarylǵan nusqasy biraz ýaqyttan beri belgili bolsa da, basylymnyń túpnusqasy nemese kóshirmesi beimálim bolatyn», - delingen qoryq-mýzeidiń habarlamasynda.
Bul basylymdy 1959 jyly QR Ǵylym Akademiiasynyń qyzmetkeri, ǵalym Qarta Qańtarbaiuly Qazan qalasynan taýyp, aýdarmasyn ǵana jasap alǵan. Osy aýdarmanyń mashinkada terilgen nusqasy mýzei qorynda saqtaýly.
«Abai mýzeiinde talai jyl qyzmet atqarǵan Muzdybai Beisenbaiuly 1984 jyly Qazan qalasyna baryp qaitqan saparynda atalǵan jarǵyny kórgenin jazǵan. Alaida elimizdegi kitaphanalar men mýzei qorlarynda osy kúnge deiin Qazan qalasynda basylǵan Qaramola jarǵysynyń birde-bir kóshirmesi bolmaǵan. Hakim Abaidyń bastamasymen qabyldanǵan «Qaramola jarǵysy» qadym jazýymen Qazan qalasyndaǵy Imperatorlyq ýniversitettiń baspahanasynan 1886 jyly Semei oblystyq áskeri gýbernatorynyń ókimi boiynsha jaryq kórgen», - delingen habarlamada.
Tabylǵan qundy qujat osy ýaqytqa deiin belgili aýdarmalardy túpnusqamen salystyrýǵa jáne jan-jaqty zertteýge múmkindik beredi.
Eske sala ketsek, ótken aida QR Prezidenti Qasym-Jomart Toqaev Abaidyń 175 jyldyq mereitoiyn atap ótý týraly Jarlyqqa qol qoiǵan bolatyn.
