«Abai-Vern» mobildi bilim baǵdarlamasyna qatysý úshin ótinish qabyldaý bastaldy, dep habarlaidy "Ult aqparat" Bilim jáne ǵylym ministrligine silteme jasap.
Baǵdarlama boiynsha 30-dan astam qazaqstandyq magistrant pen doktorant Frantsiiada tegin bilim ala alady.
Utqyrlyq baǵdarlamasy koronavirýs pandemiiasyna bailanysty moratorii engizilgennen keiin bir jyl ótken soń qaita júzege asyryla bastady.
Bilim jáne ǵylym ministri Ashat Aimaǵambetov pen Frantsiianyń Qazaqstandaǵy elshisi Dide Kaness franko-qazaqstandyq stipendiia týraly kelisimge ózgerister engizý týraly hattamaǵa qol qoidy.
2021-2022 oqý jylynda ekinshi kýrstyń 30 magistranty jáne Qazaqstan men Frantsiiadaǵy ǵylymi jetekshilermen birlesip dissertatsiia daiyndaityn 5 doktorant «Abai-Vern» stipendiiasynyń iegeri atana alady.
«Abai-Vern» stipendiiasy magistranttar men doktoranttarǵa frantsýz jáne aǵylshyn tilderinde Frantsiia ýniversitetterinde oqý úshin beriledi. Úmitkerlerdiń frantsýz joǵary oqý ornyna nemese ǵylymi-zertteý ortalyǵyna magistratýra men doktorantýra baǵdarlamalary boiynsha oqýǵa aldyn ala qabyldanǵany týraly rastaý haty bolýy tiis», - dep atap ótti QR BǴM Halyqaralyq yntymaqtastyq departamenti direktorynyń m.a. Elmira Asan.
«Abai-Vern» stipendiiasyn jeńip alǵan magistranttarǵa Ulttyq bank baǵamy boiynsha ai saiyn 800 evro, doktoranttarǵa 1200 evro mólsherinde stipendiia tólenedi.
Sondai-aq stipendiattar Frantsiiadaǵy ýniversitet jataqhanasynda oryn alýǵa artyqshylyqqa ie bolyp, uzaqmerzimdi stýdenttik viza jáne frantsýz áleýmettik saqtandyrý júiesine tegin tirkele alady.
«Abai-Vern» akademiialyq utqyrlyq baǵdarlamasy boiynsha qujat qabyldaý 4 shildege deiin jalǵasady. Kandidattardy irikteýdi franko-qazaqstandyq táýelsiz komissiia júrgizedi.
«Abai-Vern» - QR Bilim jáne ǵylym ministrligi men Frantsiianyń Eýropa jáne syrtqy ister ministrliginiń birlesken stipendiialyq baǵdarlamasy.
Kelisimge qol qoiylǵan kezden bastap 158 qazaqstandyq magistrant pen doktorant bedeldi «Abai-Vern» halyqaralyq stipendiiasynyń iegeri atanǵan.
