Foto: Turar Qazanǵapov, Tengrinews.kz
Qaraǵandy oblysy Abai shahtasyndaǵy apat saldarynan qaza bolǵan kenshilerdiń aty-jóni men zardap shekkenderdiń jaǵdaiy belgili boldy.
Shahtadaǵy apat kezinde zardap shekken eki adam jansaqtaý bóliminde jatyr. Dárigerlerdiń aitýynsha, olar gazdan qatty ýlanǵan. 61 jáne 58 jastaǵy kenshilerge qoiylǵan diagnoz – toksikogipoksiialyq entsefalopatiia.
Sonymen qatar qaza bolǵandardyń tizimi jariialandy:
1. Kraýs Sergei Iýrevich, taý-ken qazý mashinalarynyń mashinisi, 1983 jyly dúniege kelgen, úilengen.
2. Shmidt Vitalii Vladislavovich, úńgýshi, 1979 jyly dúniege kelgen, úilengen.
3. Abdýllin Nail Ramilevich, úńgýshi, 1990 jyly dúniege kelgen, úilengen.
4. Kornienko Sergei Anatolevich, taý-ken qazý mashinalarynyń mashinisi, 1971 jyly dúniege kelgen, úilengen.
5. Sýprýnov Aleksei Alekseevich, ýchaske bastyǵynyń kómekshisi, 1987 jyly dúniege kelgen, úilengen.
6. Skidchenko Nikolai Nikolaevich, tehnika qaýipsizdigi boiynsha jeldetýdiń taý-ken sheberi, 1968 jyly dúniege kelgen.
"Abai" shahtasynda zardap shekken qyzmetkerler:
1. Maralbaev Jeńis Merekeuly, úńgýshi, 1963 jyly dúniege kelgen;
2. Zeinalov Elaidyn Avez-ogly, úńgýshi, 1960 jyly dúniege kelgen.
Jaraqat alǵan eki jumysshy Qaraǵandy qalasyndaǵy Maqajanov atyndaǵy jalpy meditsinalyq ortalyqqa jetkizildi (jaǵdailary aýyr).
Tótenshe jaǵdai ministrliginiń aqparaty boiynsha, saǵat 12.37-de TJ-ny joiýǵa jumyldyrylǵan "KÁAQQ respýblikalyq ortalyq shtaby" JShS QF (15 qyzmetker), TJD (3 qyzmetker jáne 2 birlik tehnika), Apattar meditsinasy ortalyǵy filialynyń (3 qyzmetker jáne 1 birlik tehnika) kúshteri men quraldary qaitys bolǵandardy shahtadan shyǵaryp aldy.
Qaraǵandy oblysy ákimi baspasóz qyzmetiniń málimetinshe, aimaq basshysy Jeńis Qasymbek "Abai" shahtasynda keńes ótkizdi. Jaǵdai týraly "ArselorMittal Temirtaý" AQ Kómir departamentiniń direktory Andrei Chernomaz jáne basqa da jaýapty tulǵalar baiandady.
Jedel shtab quryldy, oǵan kompaniia men memlekettik organdardyń ókilderi kirdi. Oblys jáne kompaniia basshylyǵy qaza tapqan kenshilerdiń otbasylaryna barady. Qazaqstan premer-ministri Asqar Maminniń tapsyrmasy boiynsha TJ ministri Iýrii Ilinniń basshylyǵymen TJ mán-jaiy men sebepterin anyqtaityn memlekettik komissiia quryldy.
Eske salaiyq, 7 qarasha kúni saǵat 08:37-de «ArselorMittal Temirtaý» AQ Kómir departamentiniń «Abai» shahtasynda tótenshe jaǵdai oryn aldy. Apat kezinde shahtada barlyǵy 64 adam bolǵan. 56 adam ózderi jer betine shyqqan. Metan gazy taraǵan 3-K10 kenjarynda segiz adam qalǵan. Altaýy qaza taýyp, ekeýi zardap shekti, olardyń jaǵdaiy aýyr.
TJD jedel shtabynyń telefony (8-7212) 51-11-10, jedel jeli - (8-7212) 51-72-23.
