Onlain rejiminde ótken apparattyq keńeske qatysýshylar «Abai» shahtasynda qaza tapqan kenshilerdi bir minýt únsizdikpen eske aldy. Shahtadaǵy jumystar apattyń mán-jaiy tolyq anyqtalǵanǵa deiin toqtatyldy. Qazir «ArselorMittal Temirtaý» AQ-nyń barlyq segiz shahtasynda tekserý júrip jatyr, dep habarlaidy QazAqparat.
Oblys basshysy Jeńis Qasymbek qalalar men aýdandar ákimderine oblystyń barlyq ónerkásiptik kásiporyndarynda eńbek qaýipsizdigin jappai tekserý júrgizýdi tapsyrdy. Bul máselege barynsha jaýapty qarap, nemqurailylyqqa jol bermeý kerektigin qadap aitty.
Eske sala keteiik, keshe «Abai» shahtasynda kenetten metan tarady. Alty shahtior qaitys boldy, ekeýi aýrýhanada jatyr. Jeńis Maralbaevty jansaqtaý bóliminen bólimshe palatasyna aýystyrdy, Elaidyn Zeinalovty da palataǵa aýystyrýǵa daiyndaýda.
Qaza tapqandar men zardap shekkenderdiń otbasylaryna barlyq qajetti kómek kórsetiledi. Másele oblys ákiminiń jeke baqylaýynda.
«Oblys ákimdiginiń atynan qaza bolǵandardyń týystary men jaqyndaryna qaiǵyryp kóńil aitamyn. Keshe biz marqumdardyń otbasylaryna bardyq. Osy qiyn-qystaý kúnderde oblystyń barlyq turǵyndary sizdermen qaiǵy-qasiretti bólisedi», – dedi Jeńis Qasymbek.
