ونلاين رەجيمٸندە ٶتكەن اپپاراتتىق كەڭەسكە قاتىسۋشىلار «اباي» شاحتاسىندا قازا تاپقان كەنشٸلەردٸ بٸر مينۋت ٷنسٸزدٸكپەن ەسكە الدى. شاحتاداعى جۇمىستار اپاتتىڭ مەن-جايى تولىق انىقتالعانعا دەيٸن توقتاتىلدى. قازٸر «ارسەلورميتتال تەمٸرتاۋ» اق-نىڭ بارلىق سەگٸز شاحتاسىندا تەكسەرۋ جٷرٸپ جاتىر, دەپ حابارلايدى قازاقپارات.
وبلىس باسشىسى جەڭٸس قاسىمبەك قالالار مەن اۋداندار ەكٸمدەرٸنە وبلىستىڭ بارلىق ٶنەركەسٸپتٸك كەسٸپورىندارىندا ەڭبەك قاۋٸپسٸزدٸگٸن جاپپاي تەكسەرۋ جٷرگٸزۋدٸ تاپسىردى. بۇل مەسەلەگە بارىنشا جاۋاپتى قاراپ, نەمقۇرايلىلىققا جول بەرمەۋ كەرەكتٸگٸن قاداپ ايتتى.
ەسكە سالا كەتەيٸك, كەشە «اباي» شاحتاسىندا كەنەتتەن مەتان تارادى. التى شاحتيور قايتىس بولدى, ەكەۋٸ اۋرۋحانادا جاتىر. جەڭٸس مارالباەۆتى جانساقتاۋ بٶلٸمٸنەن بٶلٸمشە پالاتاسىنا اۋىستىردى, ەلايدىن زەينالوۆتى دا پالاتاعا اۋىستىرۋعا دايىنداۋدا.
قازا تاپقاندار مەن زارداپ شەككەندەردٸڭ وتباسىلارىنا بارلىق قاجەتتٸ كٶمەك كٶرسەتٸلەدٸ. مەسەلە وبلىس ەكٸمٸنٸڭ جەكە باقىلاۋىندا.
«وبلىس ەكٸمدٸگٸنٸڭ اتىنان قازا بولعانداردىڭ تۋىستارى مەن جاقىندارىنا قايعىرىپ كٶڭٸل ايتامىن. كەشە بٸز مارقۇمداردىڭ وتباسىلارىنا باردىق. وسى قيىن-قىستاۋ كٷندەردە وبلىستىڭ بارلىق تۇرعىندارى سٸزدەرمەن قايعى-قاسٸرەتتٸ بٶلٸسەدٸ», – دەدٸ جەڭٸس قاسىمبەك.
