Foto: QR Mádeniet jáne aqparat ministrligi
Biyl «Abai» operasynyń alǵash sahnalanǵanyna 80 jyl.
Toǵyz jyl buryn Muhtar Áýezovtiń librettosyna jazylǵan Ahmet Jubanov pen Latif Hamididiń shyǵarmasy «Astana Opera» sahnasynda jańa redaktsiiada qoiyldy.
Qoiýshy dirijeri – Qazaqstannyń eńbek sińirgen qairatkeri, QR Memlekettik syilyǵynyń iegeri, Ahmet Jubanovtyń nemeresi – Alan Bóribaev.
«Men úshin «Abai» operasyna dirijerlik etý – ár kez ishi-baýyrymdy eljiretip, tolqytatyn sezim. Bul – ǵalamat týyndy, eshqandai artyq nota joq, ol álemdik klassikalyq operanyń ozyq úlgisi, – deidi Alan Bóribaev óz suhbattarynyń birinde.
Foto: QR Mádeniet jáne aqparat ministrligi
Qoiylymda Bóribaevpen birge italiandyq rejisser Djankarlo del Monako, keńesshi rejisser Esmuhan Obaev, bas hormeister Qazaqstannyń eńbek sińirgen qairatkeri Erjan Dáýitov, sondai-aq kórnekti stsenograf Etsio Fridjerio jáne kostiýmer boiynsha sýretshi «Oskar» syilyǵynyń iegeri Franka Skýarchapino jumys istegen.
«Abai» operasy álemdik deńgeidegi sahnalardy baǵyndyryp, qazaq mýzykasynyń maqtanyshyna ainaldy.
2018 jyly «Astana Opera» teatry osy eńbegi úshin Qazaqstan Respýblikasynyń Memlekettik syilyǵyna ie boldy.
Foto: QR Mádeniet jáne aqparat ministrligi
«Abai» qoiylymy tek mahabbat, jaqsy men jamannyń aiqasyn beinelegen qoiylym ǵana emes, qazaq halqynyń jan dúniesiniń alýandyǵy men tereńdigin kórsetetin aina, kóshpeli ómirdiń biregei salty men filosofiiasyn kórermenge pash etetin týyndy.
Kórermender klassikany «Astana Operanyń» jańa maýsymynda tamashalap úlgerdi.
