Foto: QR OAM
18-21 maýsym aralyǵynda Abai oblysynda ótip jatqan XXVI «Abai oqýlary» respýblikalyq shyǵarmashylyq konkýrsy biyl uly aqyn Abai Qunanbaiulynyń 180 jyldyq mereitoiyna orai halyqaralyq deńgeide uiymdastyrylyp otyr, dep habarlaidy Ult.kz.
Ziiatkerlik saiysta respýblikanyń barlyq óńirinen kelgen oqýshylarmen qatar, Mońǵoliia, Túrikmenstan, Ózbekstan jáne Qytai elderinen de qatysýshylar baǵyn synaidy. Kórkemsóz baiqaýyna jalpy bilim beretin uiymdardyń 8–11 synyp oqýshylary qatysady.
Baiqaý mektep oqýshylary arasynda qazaq ádebieti men mádenietine degen qyzyǵýshylyqty arttyrý, Abai men Shákárim shyǵarmalaryn nasihattaý, ulttyń kórkemdik-estetikalyq murasyn dáripteýge baǵyttalǵan.
Qorytyndy kezeńde 130-dan astam jas daryn 5 nominatsiia boiynsha saiysady: «Abaidyń asyl murasy», «Abaidyń aqyn shákirtteri», «Ándi súiseń, menshe súi», «Óleńge árkimniń-aq bar talasy», «Sóz ónerindegi Uly Abai beinesi».
Basty shart - qatysýshylar Abai shyǵarmalaryn jatqa aitýy tiis.
Qatysýshylar úshin Abai aýdany Jidebaiǵa ekskýrsiia uiymdastyrylady, 20 maýsym kúni baiqaý nominatsiialar boiynsha jalǵasady. Jeńimpazdardy marapattaý rásimi 21 maýsym kúni ótedi.
Abai oqýlarynyń júldegerleri Qazaqstan Respýblikasy Oqý-aǵartý ministrliginiń I, II, III dárejeli diplomdarymen jáne medaldarmen marapattalady. Sondai-aq «Daryn» respýblikalyq ǵylymi-tájiribelik ortalyǵynyń gramotalary men baǵaly syilyqtar tapsyrylady
