Foto: Abai oblysy ákimdiginiń baspasóz qyzmeti
Úkimet Abai oblysyndaǵy órtten qaza tapqan ormanshylardyń otbasylaryna qandai kómek kórsetilip jatqanyn aitty, dep habarlaidy "Ult aqparat" primeminister.kz saityna silteme jasap.
"Oblys ákimdigi ýákiletti memlekettik organdarmen birlesip, Ýspen orman sharýashylyǵyndaǵy iri órtti sóndirý kezinde «Semei ormany» memlekettik orman tabiǵi rezervaty» RMM-niń qaza tapqan 14 qyzmetkeriniń, sondai-aq órtti sóndirýge qatysqan traktorshy Sergei Arhipovtyń otbasy músheleriniń tizimin jasady" - delingen habarlamada.
Memleket basshysynyń tapsyrmalaryna sáikes olarǵa kelesidei áleýmettik qoldaý túrleri kórsetilip jatyr:
- Semei qalasynda jihazben jabdyqtalǵan eki nemese úsh bólmeli (otbasy músheleriniń sanyna qarai) páterler berildi;
- qaza tapqandar men olardyń otbasy músheleriniń nesie qaryzdary óteledi. Óteletin qaryzdardyń jalpy mólsheri 36,2 million teńge bolady (15 maýsymdaǵy jaǵdai boiynsha);
- "Qazaqstan halqyna" qorynan ár otbasyǵa 7 million teńgeden jáne kámelettik jasqa tolmaǵan ár balaǵa 2 million teńgeden materialdyq kómek. Tólemderdiń jalpy somasy – 127 million teńge (15 maýsymdaǵy jaǵdai boiynsha);
- asyraýshysynan aiyrylǵan otbasy múshelerine memlekettik biýdjetten ai saiynǵy járdemaqy;Memlekettik áleýmettik saqtandyrý qorynan asyraýshysynan aiyrylý boiynsha 18 jasqa deiingi balalarǵa, JOO-da kúndizgi oqý bóliminde oqysa, oqýdy aiaqtaǵanǵa deiin, biraq 23 jastan aspaityn balalarǵa ai saiynǵy áleýmettik tólem;
- BJZQ-dan jerleý rásimderi úshin birjolǵy járdemaqy;
- jalpy bilim berý qorynan mektep jasyndaǵy balalarǵa 500 myń teńge mólsherinde materialdyq kómek, sondai-aq kerek-jaraqtar (aiaqkiim, forma) men jazǵy lagerge joldama;
- jumys berýshiniń qarajaty esebinen ai saiynǵy tólemder (jalaqy mólsherine bailanysty);
- ujymdyq shartqa sáikes jumys berýshiniń esebinen birjolǵy kómek.
Sonymen qatar «Qazaqstan Halyq banki» AQ ár otbasyna 3 mln teńge kóleminde materialdyq járdem berip, basqa da kommertsiialyq uiymdar kómek kórsetedi.
Oǵan qosa ákimdik «Aq Ertis» QQ-men birlesip, qaza tapqandardyń otbasy men zardap shekkenderge odan ári kómek kórsetý maqsatynda qaiyrymdylyq pen demeýshiler qarajatyn jinaqtaý úshin arnaiy shot ashty.
