Foto: Akorda.kz
Abai oblysyndaǵy órtten qaza tapqan 14 ormanshynyń ishindegi qyrshyn ketkenniń biri - Serikjan Toqtasyn. Ol Orman sharýashylyǵy mamandyǵy boiynsha bilim alyp, "Semei ormany" memlekettik orman tabiǵi rezervaty Novoshýlba filialynda bes jyldan beri qyzmet atqarǵan, - dep habarlaidy Massaget.kz portaly
Órtpen kúres kezinde kóz jumǵan ormandy qorǵaý jónindegi injener Borodýliha aýdany, Borovlianka aýylynda ata-anasymen birge turǵan. Balasynyń sýretin qushaqtap jylaǵan anasy Dameli Qabimoldaiqyzy "qazir keledi, keledi ulym" degen úmitpen áli de balasynyń joǵyna sene almai kóz jasy tyia almai otyr.
Serikjan Toqtasynnyń ákesi Baqytjan Jumadilovtiń aitýynsha, "Novoshýlba" orman sharýashylyǵynyń basshylary ulyn eshbir qorǵanysh kiimsiz órt bolǵan aýmaqqa jibergen.
"Saǵat 19:00-de qyzmetkerdiń bárin jinap, 45 kilometr jerdegi órt bolyp jatqan aimaqqa jiberedi. Saǵat 21:00-de da qalyń órttiń ortasyna qoldaryna kúrek berip, kirgizip jibergen. Kúndiz bastalǵan órtti basshylyq baqylamaǵan. Ábden ýshyqqannan keiin aýyl-aimaqqa enýinen qorqyp, "Novoshýlba" orman sharýashylyǵy qorǵaýy kerek dep asyǵys-úsigis attandyryp jibergen. Meniń balam eski "Nivamen", basqalary bireýdiń jekemenshik ÝAZ-ymen barǵan" - dedi ulynan aiyrylyp qabyrǵasy qaiysqan áke.
Marqumnyń ákesi balasynyń ústinde qorǵanysh kiimi de bolmaǵanyn aitty.
"Qorǵanysh kiimderi gazdan qorǵaityn qurylǵylarymen birge orman sharýashylyǵynyń qoimalarynda jatady. Tek bir ǵana órt sóndirý kóligi barǵan. Ol orman qorǵaý jónindegi injeneri qyzmetin atqarǵandyqtan, ortalyq ofiste otyryp, kimniń qaida barýyn ratsiiamen aityp, basqarýy kerek edi. Balamdy direktor men onyń orynbasary "sen sol jerge barýyń kerek" dep jibere salǵan. Al ózderi "bizdiń densaýlyǵymyz joq, ormannyń ishinde júre almaimyz" degen, - dedi Baqytjan Jumadilov.
Ol balasynyń máiitin eki kúnnen beri saraptamadan ala almai júrgenin aitty.
"Olardyń aitýynsha, aldymen balam ýlanǵan. Sodan keiin denesin órt sharpyǵan. Denesin taný múmkin emes. Jerlei almai otyrmyz. Endi DNQ nátijesine bailanysty belgili bolady dep otyr. Onyń qashan shyǵatyny taǵy belgisiz", - dep ashyndy ákesi.
Serikjannyń jalaqysy nebári 80-100 myń teńge ǵana bolǵan.
"Jalaqysy alǵashynda 80 myń teńge bolǵan edi. Qazir 100 myńǵa jýyq alatyn. Oqýyn bitirip kelgennen keiin osy jerde bes jyl injener bolyp jumys istegen. Sodan keiin "jalaqym az" dep Pavlodarǵa jumys isteýge ketip qalǵan. Ol jerde zaýytta jumys istep, jap-jaqsy 200 myń teńge jalaqy alyp júrgen. Biz zeinettemiz. Sheshesiniń júrek aýrýy bar edi. Arasynda qysylyp, demala almai qalatyn. Ulymnan basqa úsh qyzym turmysta, basqa jaqta turady. Sol sebepti úide bir-birimizge kómektesip ázer júrgennen balamdy bir jarym ai buryn elge shaqyryp alǵanmyn", - dep kúńirendi marqumnyń ákesi.
