© Photo: Qazaqstannyń Ekologiia jáne tabiǵi resýrstar ministrligi
Senat depýtaty Sergei Ershov tótenshe jaǵdailar salasynda qordalanǵan problemalardy atady, dep habarlaidy Sputnik Qazaqstan.
"Abai oblysyndaǵy órtten adamdar qaza boldy jáne 60 myń gektardan astam ormandy alqap kúlge ainaldy. Bul aýqymdy órt tótenshe jaǵdailar salasyndaǵy birqatar júieli problemany ashyq kórsetti", - dep málimdedi Ershov depýtattyq saýalynda.
Ol jaǵdaiǵa egjei-tegjeili taldaý jasaý barysynda mańyzdy eki problema anyqtalǵanyn atap ótti. Birinshisi – tótenshe jaǵdaimen kúreste áleýetti kúshter men tiisti quraldardyń jetispeýshiligi. Ekinshisi – tótenshe jaǵdaidan qorǵaýdy qamtamasyz etýdegi júieli tásildiń bolmaýy.
"Elimizde memlekettik órtke qarsy qyzmettiń 426 bólimshesi bar, áli qosymsha 121 depo salý qajet. Bizge usynylǵan málimetterge sáikes, tipti 2030 jylǵa qarai órt sóndirý bólimshelerin salý qajettigi tek 55%-ke ǵana oryndalady. Jalpy tehnika sanynyń shamamen 20%-i ótken ǵasyrdyń 70-90-jyldarynan bastap paidalanylyp keledi jáne jańartýdy talap etedi", - deidi senator.
Ershov problemalardy sheshýge qarjy bólinetinin, biraq esep-qisapqa qaraǵanda igerilmeitinin aitty. Osydan kelip ekinshi másele týyndaidy.
Senator 2018 jylǵy jeltoqsanda osy saladaǵy erekshe mekeme – kásibi áskerilendirilgen avariialyq-qutqarý qyzmeti jekeshelenip ketkenin eske saldy. Aitýynsha, osy sheshimniń saldarynan memleket asa kúrdeli avariiany jedel joiýdy qamtamasyz ete alatyn mamandandyrylǵan qyzmetten aiyrylyp qaldy.
Sonymen qatar, tótenshe jaǵdailar ministrliginiń aqparaty boiynsha, Qazaqstan aýmaǵynda memlekettik emes órtke qarsy 331 qyzmet nysany bar. Bul elimizdegi órt sóndirý bólimsheleriniń jartysyna jýyǵy memlekettik emes degendi bildiredi.
"Memlekettik emes órtke qarsy qyzmetti (MEÓQQ) tótenshe jaǵdaidy joiýǵa tartý tártibin retteitin zańnamada qutqarý qyzmeti sekildi órtti sóndirý bóliginde naqty belgilengen quqyqtyq mindetteme kórsetilmegen. Sondai-aq olardyń óz mindetterin tiisinshe oryndamaǵany úshin jaýapkershiligi qarastyrylmaǵan. "Azamattyq qorǵaý týraly" zańnyń 67-shi babyna sáikes, órt bolǵan jaǵdaida memlekettik emes órtke qarsy qyzmetti óziniń tikelei fýnktsiiasyn mindetti túrde oryndaýdyń ornyna tek "járdem kórsetýge" mindetti", - deidi senator.
Osyǵan bailanysty Ershov jekeshelengen kásiporyndar portfelin ártaraptandyrý, sondai-aq tótenshe jaǵdaidy joiý barysynda memlekettik emes uiymdardyń jaýapkershiligi jóninde normativtik-quqyqtyq retteýdi jetildirýdi usyndy.
