Foto: Akorda.kz
Búgin Tótenshe jaǵdailar ministri Syrym Sháriphanov jedel shtabtyń keńesin ótkizdi. Onda orman órtin sóndirý boiynsha negizgi mindetter tujyrymdaldy, sondai-aq óńirdegi orman órti jaǵdaiyn turaqtandyrý úshin qosymsha sharalar ázirlendi, dep habarlaidy "Ult aqparat" vedomstvonyń baspasóz qyzmetine silteme jasap.
«Órtti sóndirý jáne zalaldy azaitý, eń bastysy – halyqty qorǵaý boiynsha barlyq qajetti sharalar qabyldandy. Oqiǵa ornynda táýlik boiy kezekshi mamandar, jedel shtab jumys isteidi», - dep atap ótti ministr.
Ol sondai-aq barlyq qajetti kúsh-quraldar qoiylǵan mindetterdi odan ári oryndaýǵa daiyn ekenin atap ótti.
"Otyrystan keiin ministr ormandy dala aimaǵynyń aýmaǵyna aerovizýaldy zertteý júrgizdi. Ushý qorytyndysy boiynsha órt oshaqtaryna kúsh-quraldardy qaita toptastyrý júrgizildi. Sondai-aq, órt ýchaskelerinde sý tógetin qurylǵylary bar tikushaqtardy aýystyrý týraly sheshim qabyldandy" - delingen habarlamada.
Orman órtin sóndirýge Abai, Jetisý, Shyǵys Qazaqstan, Qaraǵandy, Almaty oblystarynyń, sondai-aq Astana jáne Almaty qalalarynyń TJD kúshteri men quraldary jáne TJM bólimderiniń áskeri qyzmetshileri qatysyp jatyr.
Sondai-aq TJM, orman sharýashylyǵy komiteti, jergilikti atqarýshy organdar jáne Qorǵanys ministrliginen 1500-ge jýyq adam jáne 300-den astam tehnika jumyldyrylǵan. Órt bastalǵaly beri 14 tikushaqtyń kómegimen jalpy kólemi 3039 tonnadan asatyn 1017 sý aǵyzý júzege asyrylǵan.
Órtti sóndirý kúrdeli relefti jerler men 17 m/s qatty ekpindi jeldiń saldarynan qiynǵa soǵyp otyr. Syrym Sháriphanov jaǵdaidy eskerip, jedel shtabqa tiisti tapsyrmalar berdi.
«Órtti toqtatý jáne oqshaýlaý asa kúrdeli jáne kóp eńbekti qajet etedi. Jer bederiniń jaǵdailary men otpen kúrestegi kedergiler eskerilýi kerek», - dep atap ótti ol.
Qazir Abai oblysynda órtti sóndirý úsh baǵytta jalǵasyp jatyr (ońtústik, batys jáne shyǵys jiekter). Shyǵys baǵytta aýyr tehnikamen mineraldanǵan jolaqtar jasaý jumystary júrgizilýde.
Syrym Sháriphanov orman órtin sóndirýge qatysqandardyń barlyǵyna alǵysyn bildirip, qalyptasqan jaǵdailarǵa qaramastan, birlesken kúsh-jiger tabiǵi apatty tez arada joiýǵa ákeletinine sendirdi.
