Foto: QR TJM
Abai oblysyndaǵy orman órtin sóndirýge 10 tikushaq jumyldyryldy, dep habarlaidy "Ult aqparat" QR Tótenshe jaǵdailar ministrliginiń baspasóz qyzmetine silteme jasap.
Vedomstvo málimetinshe, orman órtin sóndirýge Tótenshe jaǵdailar ministrliginen - 5, Qorǵanys ministrliginen - 3, Ekologiia jáne tabiǵi resýrstar ministrliginen - 2, iaǵni barlyǵy 10 tikushaq jumyldyrylǵan. Onyń ishinde 2 tikushaq aýmaqty aerovizýaldy ushýdy júrgizedi. Búgingi tańda 52 ret 130 tonna sý aǵyzylǵan. Sondai-aq, barlyǵy 298 ret 745 tonna sý sebilgen.
"Órtti sóndirýge jeke quramnyń 800-den astam adamy, 200-den astam tehnika, 1 QTJ órt sóndirý poiyzy jumyldyryldy.
Qazir aviatsiialyq jáne avtomobil tehnikasyn paidalana otyryp, úsh ýchaskede sóndirý júrgizilip jatyr. Sondai-aq 68303 TJM áskeri bóliminiń jáne Qorǵanys ministrliginiń áskeri qyzmetshileri jekelegen oshaqtardy 126 adam mólsherindegi riýkzaktarmen jáne múmkindik quraldarymen sóndirýde" - delingen habarlamada.
Vedomstvo baspasóz qyzmetiniń habarlaýynsha, qazir eldi mekenderge qaýip tónip turǵan joq. Jalpy janý aýmaǵy shamamen 3500 ga. quraidy. Sekýndyna 6-10 metr ekpindi jeldiń bolýy saldarynan, órtti sóndirý jumystary qiyndaýda. Sondai-aq tyǵyz ósetin daqyldar men tuzdy jerlerdiń bolýy da órttiń órshýine áser etip otyr.
"Aýdan ákimi E. Selihanovtyń sheshimimen Abai oblysynyń Borodýliha aýdanynda jergilikti aýqymdaǵy tabiǵi sipattaǵy tótenshe jaǵdai jariialandy.
Órtti sóndirý jergilikti atqarýshy organdarmen tyǵyz qarym-qatynasta júzege asyrylady. Sondai-aq, Abai oblysynyń "Birgemiz" volonterler front-ofisimen órt sóndirý oryndarynda volonterler, olardyń uiymdarynyń jumysy uiymdastyrylyp, úilestirilýde.
TJM men Abai oblysy TJD jedel shtabtarynyń jumysy jalǵasyp jatyr. Olardyń mindetteri TJ aimaǵyndaǵy jaǵdai týraly derekterdi jinaý, óńdeý jáne taldaý, qajetti aqparatty berý; TJ kúrdelenýin jáne olardyń saldaryn boljaý; TJ joiý máselelerin jedel sheshý boiynsha usynystar daiyndaý bolyp tabylady. Sondai-aq órt ornynda komandalyq-shtabtyq mashinanyń jumysy júrgizilýde" - delingen habarlamada.
Aita keteiik, «Qazgidromet» derekteri boiynsha 24-26 mamyrda Abai oblysynyń Borodýliha aýdanynda sekýndyna 15-20 metrge deiin ekpini bar soltústik-shyǵys jel kútiledi.
