Foto: Abai oblysy ákimdigi
Úkimet otyrysynda Abai oblysynda órtke qarsy qabyldanyp jatqan sharalar týraly óńir ákimi Berik Ýáli baiandady, dep habarlaidy Ult.kz.
Ol jyl basynan beri oblys aýmaǵynda 1 orman órti, 1 dala órti jáne qurǵaq shóptiń 66 janý faktisi tirkelgenin atap ótti.
Biylǵy 4 sáýirde Besqaraǵai aýdanynda qurǵaq shóptiń janýy saldarynan «Semei ormany» tabiǵi rezervaty aýmaǵy órtendi. Jalpy janǵan aýmaq aldyn ala esep boiynsha 1,2 myń gektardy qurady. Onyń 400 gektary orman alqaby, 800 gektary jaiylymdyq jer. Rezervatta 1,4 myń gektarda qurǵaq shópti arnaiy órteý jumystary júrgizildi jáne oblys aýmaǵynda 16,3 myń shaqyrym mineraldy jolaqtar júrgizildi.
«Sonymen qatar, órt qaýipsizdigin qamtamasyz etý maqsatynda oblysta 170 adamnan turatyn 38 mobildik top quryldy. Arnaiy 7 reidtik is-shara ótkizilip, órt qaýipsizdik qaǵidasyn buzýdyń 4 faktisi anyqtaldy», — dep atap ótti Berik Ýáli.
Órt oshaqtaryn erte anyqtaý maqsatynda «QazaqstanǴaryshSapary «UK» AQ-men ózara is-qimyl sheńberinde termiialyq núktelerdiń kosmomonitoringi qamtamasyz etildi.
«Semei ormany» rezervatymen birlesip, eldi mekenderdiń janynda ornalasqan orman alqaptaryn qorǵaý úshin mehanikalandyrylǵan kúzetter ornalastyrylady. Sonymen qatar, rezervat aýmaǵynda «Qazaviaormanqorǵaý» respýblikalyq kásiporynnyń sý tógetin qurylǵylarymen 2 Eurocopter kezekshilik júrgizýde. Budan bólek Semei qalasynyń áýejaiy bazasynda «Qazaviaqutqarý» kásipornynyń (MI-8) tikushaǵy jáne Qorǵanys ministrliginiń sý tógetin qurylǵylary bar 2 tikushaǵy kezekshilikte tur.
«Aýyl qutqarýshylary» baǵdarlamasy aiasynda Besqaraǵai aýdanynyń Glýhovka aýylynda órt sóndirý beketi iske qosyldy Sonymen qatar, jyl sońyna deiin qosymsha 3 órt sóndirý beketteri ashylady.
