Abai oblysynda órtsóndirýshi qyzmettik boryshyn oryndaý kezinde qaza tapty, - dep habarlaidy "Ult aqparat" Tótenshe jaǵdailar ministrliginiń baspasóz qyzmetine silteme jasap.
Vedomstvo Aidos Toǵyzbaevtyń týǵan-týystary men jaqyndaryna qaiǵyra kóńil aitady.
"Aidos óz isiniń mamany retinde áriptesterdiń esinde máńgi qalady. TJM qaitys bolǵan órt sóndirýshiniń otbasyna jan-jaqty kómek pen qoldaý kórsetedi. Abai oblysy TJ departamentiniń psihologtary órt sóndirýshiniń týystaryna kómek kórsetip jatyr.
2022 jyldyń 7 qyrkúieginde 13:35-te 112 kezekshi pýltine Abai oblysy Jarma aýdanynyń Bozjyra aýyldyq okrýgi Birinshi aýylynyń ýchaskesinde qurǵaq shóp janyp jatqany týraly habarlama kelip tústi. Shaqyrý ornyna №22 órt sóndirý beketiniń qyzmetkerleri jiberildi. Shaqyrý ornyna kelgen órt sóndirýshiler dereý órtti sóndirýge kiristi", - delingen TJM habarlamasynda.
Tabiǵi órtti sóndirý kezinde órt sóndirý avtotsisternasy Baqyrshyq taý-ken óndirý kásipornynyń órt sóndirýge sý jetkizetin KAMAZ (12 tekshe metr) sý alǵan. Osy kezde jel baǵytynyń ózgerýi saldarynan órt avtotsisternaǵa qarai aýmaqty sharpydy. Tehnikaǵa arnalǵan evakýatsiialaý joldary barlyq jaǵynan otqa oranyp, biiktigi eki metr qaraǵan aǵashy órtendi.
Órtsóndirýshiler jaǵdaidy baǵalap, órt-tehnikalyq qarý-jaraqty jinaýdy toqtatyp, shuǵyl evakýatsiialaýǵa kiristi. Avtotsisterna men KAMAZ sý tasymaldaýshy kóligi tolyǵymen janyp ketti.
Órt sóndirý beketiniń bólimshe komandiri Amangeldi Turlybekov pen órt sóndirý beketiniń júrgizýshi-qyzmetkeri Aidos Toǵyzbaev, órtsóndirýshi-qutqarýshy Nurlan Salimjan túrli dárejedegi kúiik alyp, Jarma aýdany Shar qalalyq aýrýhanasyna jatqyzyldy.
Órt aýmaǵy 500 gektarǵa jetken, órt 8 qyrkúiekte saǵat 5.40-ta sóndirildi. Órtti sóndirýge Tótenshe jaǵdailar departamenti men jergilikti atqarýshy organdardyń jeke quramynan 14 adam men 5 birlik tehnika jumyldyryldy. Qazirgi ýaqytta oqiǵanyń mán-jaiy anyqtalyp jatyr.
"Aidos qatty kúiik alyp, jaraqatynan aýrýhanada kóz jumdy. Qyzmettik boryshyn oryndaý kezinde kórsetken batyldyǵy men janqiiarlyq erligi úshin azamattyq qorǵaý serjanty Aidos Erulanuly Toǵyzbaev qaza tapqannan keiin III dárejeli "Aibyn" memlekettik nagradasyna usynyldy. Aidos 36 jasta edi. Azamattyq qorǵaý organdarynda 2019 jyldan bastap qyzmet etken. Onyń artynda áieli men 5 balasy qaldy", - delingen habarlamada.
Aita keteiik, TJM málimetinshe, qyzmettik mindetterin atqarý kezinde órtke qarsy jáne qutqarý qyzmetteriniń 65 qyzmetkeri qaitys bolǵan.
